Արմեն Գևորգյանը 50-ամյակը նշել է մեծ շուքով, ՔՊ-ականների ընկերակցությամբ

Հայաստանյան տիտղոսակիր կամ որ նույնն է՝ խորհրդարանական ընդդիմությունը, նորանոր անակնկալներ է մատուցում հանրությանը՝ հատկապես իրեն ընտրած էլեկտորատին: 

Նախ, ամենածայրահեղական նախկին ընդդիմադիր Գեղամ Նազարյանը դարձավ Նիկոլ Փաշինյանի գլխավոր պրոպագանդիստ Պետրոս Ղազարյանի մշտական հյուրը:

Հետո արենան Արմեն Ռուստամյանինն էր, ով ինքնակամ որոշել էր պատժել սեփական կուսակից Մհեր Սահակյանին՝ Վլադիմիր Վարդանյանի հավին «քշա» ասելու համար:

Եվս մեկ դաշնակցական Լիլիթ Գալստյանը, սովորաբար, սիրով ուղեկցում է խմբով գործուղումների մեկնող ՔՊ-ականներին:

Նախկինում փոխվարչապետի պաշտոնը զբաղեցնող Արմեն Գևորգյանն էլ, ով «Հայաստան» դաշինքի ցուցակով այժմ պատգամավոր է դարձել և ում քրեական գործերի տրցակները, ասում են, կիլոգրամներով են չափվում, պակաս մտերմություն չի անում ՔՊ-ականների հետ: 

Նրա հայտնի նկարն էլ, որտեղ անձրևանոցը պահել էր նույն Վլադիմիր Վարդանյանի գլխին, վերջնականապես հեղինակազրկեցին նրան ու ընդհանրապես այդ դաշինքը՝ ընդդիմությանը հանուն Նիկոլ Փաշինյանի հեռացման ձայն տվածների աչքում: 

Պակաս հիշարժան չէ նաև Բաբկեն Թունյանի արած սելֆին Գևորգ Պապոյանի և նույն Արմեն Գևորգյանի հետ: 

Բայց, պարզվում է, սա դեռ ամենը չէ. ընդամենն օրեր առաջ՝ հուլիսի 8-ին, լրացել է Արմեն Գևորգյանի 50-ամյակը, որը նա նշել է մեծ շուքով, ոչ միայն սեփական թիմի, այլև ո՛չ ավել, ո՛չ պակաս «Քաղաքացիական պայմանագիր» խմբակցության պատգամավորների ընկերակցությամբ: 

Ստացվում է, որ մինչ հասարակությունը պառակտվել է ու միմյանց նիկոլական կամ քոչարյանական է պիտակում, անիծում միմյանց, չարանում միմյանց դեմ, այնտեղ՝ «վերևներում», միմյանց հետ կերուխում են անում, հաց կիսում, հայրենիք հանձնում: 

Ինչպես ասում են՝ կյանքը հեշտ, ապրուստը՝ ձրի, փորները՝ կուշտ, քրեական գործերը՝ քնած: Թքած, թե 120.000 հայ նրանց բոլորի գործուն քայլերի կարիքն ունի...  

Հ.Գ. NEWSPRESS.am-ը կփորձի պարզել, թե կոնկրետ ովքեր են ներկա եղել ծննդյան միջոցառմանը: