Սա՞ նկատի ուներ Ավինյանը, երբ ասում էր, թե աղբահանության վիճակը «մեղմվել» է ու վերադառնում են «նորմալ ցիկլի» (լուսանկարներ)

2-3 օր առաջ Երևանի քաղաքապետարանի գործակարգավարական խորհրդակցության ժամանակ հայտարարվեց, թե իբր «Աղբահանության վիճակը ծայրահեղ չէ»։

Իսկ ավելի կոնկրետ՝ աղբահանության ՊՈԱԿ-ի տնօրեն Բագրատ Աղաջանյանը զրնգուն ու ճոխ կենաց-ճառ ասաց՝ գովերգելով փոխքաղաքապետ Տիգրան Ավինյանին ու շնորհակալություն հայտնելով նրան խնդիրը կարգավորելու հարցում իրեն օգնելու համար։

Ավինյանն էլ «սրտին մոտ ընդունեց» Աղաջանյանի շողոքորթությունն ու լրջորեն հայտարարեց, թե՝ պետք չի շնորհակալություն հայտնել, թեև աղբահանության վիճակն իսկապես մեղմվել է, և վերադառնում են նորմալ ցիկլի։

Պարզ չէ, թե ինչ նկատի ուներ Ավինյանը «մեղմվել» ասելով, երևի միայն իրեն է հայտնի, քանի որ իրականում աղբահանության վիճակն ինչպես կար սրված ու ողբերգական, այնպես էլ շարունակում է մնալ։

Ստորև ներկայացված լուսանկարներն արվել են Պուշկինի 43 հասցեի հարևանությամբ։ Այն, որ աղբը լցվել ու թափվել է աղբամաններից, Ավինյանը համարում է մեղմ վիճակ։ 

Սա՞ նկատի ուներ Ավինյանը, երբ ասում էր, թե աղբահանության վիճակը մեղմվել է, ու վերադառնում են նորմալ ցիկլի։

Նա նաև նշել էր, թե ծառայողական քննություն է իրականացվելու, թե ինչու է նման վիճակ ստեղծվել։ 

Դատելով իրավիճակից՝ հազիվ թե Ավինյանը շրջելիս լինի փողոցներով ու հետևի աղբահանության վիճակին։ Ի վերջո, նա միայն այնտեղ է, որտեղ կարմիր ժապավեն կտրելու հարց կա։ Իսկ, բառի բուն իմաստով, կեղտոտ վայրերի հետ գործ ունենալ չի ցանկանում։

Ի դեպ, հիշյալ խորհրդակցության ժամանակ քաղաքապետի օգնական Կամո Արեյանը հորդորեց վերանայել աղբահանության ՊՈԱԿ-ի աշխատակազմն ու արմատապես փոխել անձնակազմը, քանի որ ներկայիս աշխատողներն անպատասխանատու են իրենց գործում։

Իհարկե, այս ամենը ճիշտ է, բայց Արեյանը մի բան հաշվի չի առել՝ ձուկը գլխից է հոտած, ու անձնակազմը փոխելու պարտավորությունը Բագրատ Աղաջանյանին հանձնարարելու փոխարեն, պետք է սկսեր հենց նրանից։ Հատկապես որ, Աղաջանյանն աչքի չի ընկնում բարի համբավով, ինչին NEWSPRESS.am-ը մի առիթով արդեն անդրադարձել է։

Իսկ քանի դեռ գործից գլուխ հանող սրտացավ ղեկավար չկա՝ աղբահանության հարցը կմնա քաղաքի օրակարգային խնդիրների առաջին հնգյակում։

Արմինե Մկրտումյան