Նավթի կշիռը բենզինի մեջ շատ է, թե քիչ է, միևնույն է բենզինի գինը չի նվազելու

«Հայաստանում բենզինի վաճառքի գինն ադեկվատ է արտերկրից դրա ձեռքբերման գնին»,- այսօր գործադիրի նիստի ժամանակ ասաց ՀՀ տնտեսական մրցակցության պետական հանձնաժողովի նախագահ Արտակ Շաբոյանը:

Նշենք, որ բենզինի շուկան բարձր կենտրոնացվածություն ունեցող շուկա է և գտնվում է ՏՄՊՊՀ տեսադաշտում:
Այնուհետև Արտակ Շաբոյանը թվախեղդ է արել կառավարությանը, փորձելով ապացուցել, որ Հայաստանում ևս բենզինի գները նվազել են դեռ նախորդ տարվանից:

Բացի այդ, ՏՄՊՊՀ-ն ուսումնասիրել է տարբեր երկրներում իրավիճակը, օրինակ 2014թ-ին եվրոպական որոշ երկրներում բենզինի գները նվազել են 7-10 տոկոսով, իսկ 2015-ի ընթացքում եվրոյով արտահայտված բենզինի գները Հայաստանում նվազել են 14 տոկոսով:

Նավթի գների նվազմանը զուգահեռ ամեն անգամ Արտակ Շաբոյանը մատնացույց է անում, որ բենզինի մեջ նավթի տեսակարար կշիռը փոքր է և դա չի ազդում բենզինի գների վրա, սակայն այս անգամ Շաբոյանն ասաց հակառակը, այն է, որ նավթի տեսակարար կշիռը կարևոր նշանակություն ունի բենզինի գնի վրա:

Այս անգամ փոփոխված ՏՄՊՊՀ տեսակետը ներկայացրել է, որ Ռուսաստանում նավթի արդյունահանման ծախսերը մեծ ծավալ են կազմում, հարկերն ունեն տեսակարար մեծ կշիռ, նաև կատարվում են բենզինի ներկրման տրանսպորտային մեծ ծախսեր: Ստացվում է, որ Հայաստանում բենզինի գինը չի նվազելու` հույս չունենաք:

Նշենք, որ բենզինի շուկայի 85%-ը կենտրոնացած է երկու՝ «Սիթի պետրոլ գրուպ» (շուկայի մասնաբաժինը՝ 41,76%) և «Ֆլեշ» (մասնաբաժինը՝ 42,62%) ընկերությունների ձեռքում:

Կարճ ասած, ՏՄՊՊՀ-ն չունի, կամ չի կարողանում ոչ Բարսեղ Բեգլարյանի հետ գործ ունենալ, ոչ Աշոտ Սալազարյանի: