Հայաստանի շփումներն ԱՄՆ-ի հետ տարածաշրջան կբերի ապակայունացում. Զախարովա

ՆԱՏՕ-ի միջամտությունը երկար ժամանակ կհետաձգի Հարավային Կովկասի լիարժեք կարգավորումը և միայն կվատթարացնի իրավիճակը տարածաշրջանում, դրանում վստահ են Ռուսաստանի իշխանությունները։ Այս մասին ճեպազրույցում հայտարարել է Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան, փոխանցում է ՏԱՍՍ-ը։

Մեկնաբանելով Պենտագոնի հետ Հայաստանի շփումները՝ Զախարովան ընդգծել է, որ ՆԱՏՕ-ի երկրները, այդ թվում՝ ԱՄՆ-ն և Թուրքիան, առանձնահատուկ հետաքրքրություն են ցուցաբերում Հարավային Կովկասի նկատմամբ։

Նրա խոսքով` այս ամենը կբերի ապակայունացում և երկար ժամանակով կհետաձգի տարածաշրջանի լիարժեք կարգավորումը։

Անցյալ տարի ՆԱՏՕ-ի ներկայացուցիչ Խավիեր Կոլոմինան հայտարարեց, որ Հարավային Կովկասը Դաշինքի համար ռազմավարական տարածաշրջան է, ուստի կազմակերպությունը, ի թիվս այլ բաների, աջակցում է Ադրբեջանի և Հայաստանի միջև հարաբերությունների կարգավորմանն ուղղված ջանքերին։

Միաժամանակ, ՌԴ ԱԳՆ ներկայացուցիչը կարծիք է հայտնել, որ Ուկրաինան և Արևմուտքը կոչ են անում Վրաստանին երկրորդ ճակատ բացել Ռուսաստանի դեմ Կովկասում։

Ավելի վաղ Ադրբեջանի նախագահ Իլհամ Ալիևը հայտարարել էր, որ Բաքվի և Երևանի միջև խաղաղ համաձայնագրի ստորագրումն անխուսափելի է: