Ֆեյսբուքյան թեստերի միջոցով կորզվում են անձնական տվյալներ

Այսօր Ֆեյսբուք սոցիալական ցանցի ստեղծման օրն է: Այն հիմնադրվել է 2004թ.-ին: Տեղեկատվական անվտանգության փորձագետ, բլորգեր Սամվել Մարտիրոսյանը «Անդրադարձ» մամուլի ակումբում լրագրողների հետ զրույցում նշեց, որ 560 000 մարդ օգտվում է սոցցանցից:

«Չնայած նրան, որ գրեթե բոլոր երկրներում Ֆեյսբուքը առաջատար է, բայց այդպես էլ մեզ մոտ չի դարձել թիվ մեկ սոցիալական ցանցը` Օդնոկլասնիկի-ում գրանցվածները գրեթե մեկ անգամ գերակշռում են»,-մանրամասնեց բլոգերը:

Ասուլիսի մյուս բանախոս սոցիոլոգ Ահարոն Ադիբեկյանն էլ շեշտեց, որ Ֆեյսբուքը դարձել է մեր հասարկության հայելին և լավ ու վատ արտացոլումներ այստեղ կան. այն ոչ միայն տեղեկատվական, այլև ծանոթության հարթակ է:

«Իմ երկու աշխատակիցները ցանցի ծանոթության միջոցով ամուսանացել են արտերկիր»,- մանրամասնեց Ադիբեկյանը:

Սամվել Մարտիրոսյանի կարծիքով էլ Հայաստանում ֆեյսբուքը նպաստեց քաղաքացիական հասարակության ձևավորմանը, և 2010-ի գարնանը «Մոսկվա» կինոթատրոնի ամառային դահլիճի քանդման հետ կապված մեծ շարժում սկսվեց հենց «Ֆեյսբուքի» միջոցով: Մինչֆեյսբուքյան «դարաշրջանում», ըստ Մարտիրոսյանի, քաղաքացիական հասարակությունը հասարակական կազմակերպությունների սեգմենտով էր ներկայացված, որոնք կտրված էին իրականությունից, իսկ «Ֆեյսբուքը» ստեղծեց «սպոնտան» քաղաքացիական հասարակություն:

Նա նաև անդրադարձավ սոցցանցում տարածվող թեստերին:

«Անընդմեջ ինչ-որ թեստեր են անում` տեսնելու` իրենք ով են եղել նախկին կյանքում, ինչ ծառ կամ քաղաք են հիմա… Այդ թեստերը ստեղծված են կամ ինչ-որ երիտասարդների կողմից, որոնք ուզում են գումար աշխատել, կամ էլ գաղտնի ծառայության կողմից, որոնք էլ օգտատերերից ինֆորմացիա են պոկում: Թեստերն անցնելիս պետք է ուշադիր կարդալ, թե ինչ թույլտվություն է ուզում ստանալ ծրագիրը, որպեսզի թեստը շարունակվի, կան թեստեր, որոնք անցնելիս, թույլ են տալիս, որ անձնական նամակները կարդա»,-տեղեկացրեց Մարտիրոսյանը: