ՀՀԿ նախընտրական վարկը ժողովրդի վզին է. Նիկոլ Փաշինյան

ԱԺ հերթական նիստը թեժ է: Քննարկվում է ՀՀ եւ Վերակառուցման ու զարգացման միջազգային բանկի միջեւ 2015թ.-ի օգոստոսի 26-ին ստորագրված «Կենսական նշանակության ճանապարհային ցանցի բարելավման ծրագրի համար լրացուցիչ ֆինանսավորում» վարկային համաձայնագիրը: Համաձայնգրի վերաբերյալ մի շարք հարացադրումներ բարձրացրեց ՀԱԿ խմբակցության պատգամավոր Նիկոլ Փաշինյանը: Նա նախ ասաց, որ այս վարկային համաձայնագրով վերանորոգվելու է 4 մարզի 7 ճանապարհ:

«Ուզում եմ իմանալ՝ վերջին անգամ պետությունը ե՞րբ է փող ծախսել այդ ճանապարհները վերանորոգելու համար: Ըստ էության, այս վարկային միջոցներով նախկինում արված «ատկատների» հանցանքները վերացնում ենք: Վարկի մի մասը օգտագործվելու է հաջորդ տարի, այսինքն, ընտրական նպատակներով ու ՀՀԿ ներկայացուցիչները «կատոկների» վերեւը կկանգնեն, թեւերը խաչած կասեն՝ տեսեք ժողովուրդ, ոնց ենք աշխատում: Սակայն ժողովրդի վզին է նստած այդ վարկի պարտքը: Կարող եք ասել՝ երաշխիքը ո՞րն է, որ այդպես չպետք է լինի: Կարո՞ղ եք բարձրաձայն ասել, որ այդ ծրագրերը ոչ մի կապ չունեն ՀՀԿ հետ, քանի որ դրանք ժողովրդի պարտքի հաշվին կառուցվող ճանապարհներ են»,- հարցրեց Փաշինյանը:

Խոսրով Հարությունյանը հայտարարեց, որ դա ճիշտ հարցադրում է ու նման տեղեկատվություն պետք է պահանջել. «Նախարարությունը եւս մտահոգ է, որ ծախսերը արդյունավետ լինեն: Անշուշտ, երբ ձեւավորվում է որեւէ իշխանություն, ապա իր նախընտրական ծրագրին համապատասխան պետք է կառուցի իր պետական կառույցների աշխատանքը: ՀՀԿ-ն որեւէ արտառոց բան չի անելու, այլ կատարելու է նախընտրական խոստումները, եւ դրա համար, այո, բյուջետային միջոցներն էլ է օգտագործելու: Օրինակ՝ Գերմանիայի կանցլեր Անգելա Մերկելը, որ եկավ իշխանության, արտաքին պարտքից հրաժարվե՞ց, ոչ: Իսկ, օրինակ, ՀՀ նախկին իշխանություններն այդպիսի բան չե՞ն արել, արել են: Այնպես որ, սա շատ բնական է: Անգամ անտրամաբանական կլիներ, եթե լիներ ճիշտ հակառակը: Խնդիրն այն է՝ արդյունավե՞տ է դա արվում, թե ոչ»:

Խոսրով Հարությունյանի այս խոսքերը ՀԱԿ խմբակցության անդամների շրջանում ծիծաղ առաջացրեցին: Նիկոլ Փաշինյանը ծիծաղելով ասաց. «Ես, իհարկե, չգիտեմ՝ նախկին իշխանություն ասելով՝ ում, ինչ նկատի ունեք. ես երբեք իշխանություն չեմ եղել նախկինում, ապագայում միգուցե: Իսկ նախկին իշխանությունը դուք եք, Գալուստ Սահակյանն է…Դուք փարատեցիք իմ մտահոգությունները. սա կարելի է համարել ՀՀԿ նախընտրական վարկ: Ես դեմ եմ քվեարկելու»: