Դեղորայքի տեղափոխումն Արցախ խաթարված է․ Անահիտ Ավանեսյան

Մեր մասնագետները կապի մեջ լինելով Արցախի մանկաբուժական ծառայության հետ՝ փորձում են կազմակերպել մասնագիտական  որոշակի հավելյալ աջակցություն, բայց կան պացիենտներ՝ ոչ մանկահասակ, ովքեր տեղափոխման կարիք ունեն այս պահին։  Հնարավորինս մոտ ժամանակում ակնկալում են տեղափոխումն իրականացնել։ Այս մասին այսօր կառավարության նիստից հետո, լրագրողների հետ զրույցում ասաց Առողջապահության նախարար Անահիտ Ավանեսյանը։

«Քանի որ բոլոր պլանային միջամտություները կասեցված են, բոլոր դեղորայքային և բժշկական նշանակության ապրանքներն օգտագործվում են միայն անհետաձգելի և սուր կարիքի պարագայում։ Այս իրավիճակն իրենից ներկայացնում է լուրջ հումանիտար, առողջապահական ճգնաժամ»,- ասաց նա։ 

Ավանեսյանը նշեց, որ և՛ կոչերով, և՛ գրավոր կերպով ամբողջ ինֆորմացիան փոխանցվում է թե՛ Մարդու իրավունքների պաշտպանին, թե՛ Եվրոպական դատարանում մեր ներկայացուցչական խմբին, այդ ամենը փաստագրվում է և հետո հիմք է հանդիսանալու որոշակի պատժամիջոցների համար։ Ստացված պատասախանները, ըստ նրա, գոհացուցիչ չեն, քանի որ ճանապարհը բաց չէ։ 

Հարցին, թե ստացվում է, որ դեղորայքի սահմանափա՞կ քանակ է տեղափոխվում Արցախ, Ավանեսյանը պատասխանեց, որ դեղորայքը տեղի ունեցածն է, դեղորայքի տեղափոխումն Արցախ խաթարված է։