Եռակողմ հանդիպումը, Լաչինի միջանցքի բացման առումով որևէ կոնկրետ արդյունք չտվեց․ Փաշինյան (տեսանյութ)

Լաչինի միջանցքի ապօրինի արգելափակման և Լեռնային Ղարաբաղում խորացող հումանիտար ճգնաժամի պայմաններում հուլիսի 15-ին Բրյուսելում եռակողմ հանդիպում ունեցա Եվրամիության խորհրդի նախագահի և Ադրբեջանի նախագահի հետ։ Այդ հանդիպումը, ցավոք, Լաչինի միջանցքի բացման և Լեռնային Ղարաբաղում հումանիտար ճգնաժամի հաղթահարման առումով, որևէ կոնկրետ արդյունք չտվեց։ Այս մասին այսօր կառավարության հերթական նիստում ասաց Նիկոլ Փաշինյանը։ 

Նա նշեց, որ, քաղաքական առումով, Եվրամիության խորհրդի նախագահը հանդիպմանը հաջորդած իր հայտարարության մեջ ընդգծել է Լաչինի միջանցքի բացման անհրաժեշտությունը, ինչպես նաև Լեռնային Ղարաբաղի հայերի իրավունքների և անվտանգության օրակարգը, Ստեփանակերտի և Բաքվի երկխոսության միջոցով հասցեագրելու անհրաժեշտությունը։

«Մեր համոզմունքը շարունակում  մնալ այն, որ առանց միջազգային ներգրավվածության և մեխանիզմների այս երկխոսությունը չի կրող արդյունավետ լինել, առնվազն այն պատճառով, որ Բաքուն շարունակում է իր ագրեսիվ ու սպառնալից հռետորաբանությունը Լեռնային Ղարաբաղի հայության նկատմամբ, որի խորքային նպատակը, մեր գնահատմամբ, Լեռնային Ղարաբաղում էթնիկ զտումների իրականացումն է։ Հիմա արդեն դա ոչ թե տեսական պնդում է, այլ Լաչինի միջանցքի ապօրինի արգելպատմամբ իրագործվող ծրագիր, որի ուղիղ դրսևորումն էլեկտրաէներգիայի, բնական գազի, պարենի և առաջին անհրաժեշտության այլ ապրանքների՝ դեպի Լեռնային Ղարաբաղ մատակարարման իսպառ բացակայությունն է՝ Լեռնային Ղարաբաղում հայերի բնակվելը անհնարին դարձնելու նպատակով։ Ցավով է պետք ընդգծել, որ Արդարադատության միջազգային դատարանի փետրվարի 22-ի և հուլիսի 6-ի իրավական պարտադիր ուժ ունեցող որոշումները, որոնցով Ադրբեջանին պարտավորեցվում է բացել Լաչինի միջանցքը, մինչ օրս չի կատարվել»,- ասաց նա։ 

Փաշինյանի համոզմամբ` այնուհանդերձ պետք է շարունակել աշխատանքներն այս ուղղությամբ։

«Անհրաժեշտ է նաև աշխատանքներ տանել Լեռնային Ղարաբաղում հաստատված հումանիտար ճգնաժամը միջազգային մամուլում լուսաբանելու ուղղությամբ»,- շեշտեց նա։