Մեղա, մեղա, կյանքում էտ մարդկանց տեսած չկամ. Արագածոտնի մարզպետը` մարզում կրակոցների մասին

Արագածոտնի մարզի Արագածավան համայնքում այս գիշեր կրակոցներ են եղել, որոնց հետևանքով կա 2 զոհ և 1 վիրավոր: Սոցցանցում և մամուլում տեսակետներ հնչեցին, որ միջադեպի պատճառը քաղաքական է՝  կապված Արագածոտնի մարզպետ Սարգիս Սահակյանի հնարավոր պաշտոնանկության հետ:

Newspress.am-ի հետ զրույցում Սարգիս Սահակյանը վստահեցրեց, որ ոչ մահացածներին, ոչ էլ վիրավորներին չի ճանաչում:

«Մեղա, մեղա, մեղա, ո՞վ է իմ հետ կապում, կյանքում էտ մարդկանց տեսած չկամ, էտ ինչե՞ր են ասում, այ քեզ բան»,- զարմացած ասաց մարզպետը:

Նա այդպիսի լուրերը որակեց ստահոդ և նշեց, որ դրանք մեկնաբանության կարիք չունեն:

Newspress.am-ը զրուցեց նաև Արագածավան համայնքի ղեկավար Անդրանիկ Պապիկյանի հետ, ով նշեց, որ շատ լավ է  ճանաչում միջադեպի մասնակիցներին, նրանք երբեք քաղաքականությամբ չեն զբաղվել:

«Հաչոցներ են, թե մարզպետի հետ է կապված, քաղաքական պատճառներ կան, էտ մարդիկ անասնապահ են, հասարակ, պարզ, գիշերվանից վազում, ուզում եմ հասկանալ ինչ ա եղել»,- վստահեցրեց նա:

Գյուղապետը նաև ասաց, որ միջադեպի մասնակիցները պարտք-պահանջ միմյանց հետ չեն ունեցել, իրենք քրտինքով ապրող մարդիկ են եղել: Պապիկյանը նաև տեղեկացրեց, որ մահացածները երեխաներ ունեն:

Հիշեցնենք, որ ըստ ոստիկանության` 1981 թ.-ին ծնված Սեդրակ Ղ.-ն իրեն պատկանող «ՖԱԲԱՐՄ» տիպի, 12 մմ տ/չ ողորկափող որսորդական հրացանից կրակոց է արձակել, ինչի հետևանքով Արտյոմ Խամոյանը և 1967 թ.-ին ծնված Վարդգես Գալստյանը մահացել են, իսկ Արման Խ.-ն ստացել է մարմնական վնասվածքներ:

Գալստյանի և Խամոյանների վրա կրակելու կասկածանքով բերման է ենթարկվել նույն գյուղից Սեդրակ Ղ.-ն: