Կասկածելի գործարք. ինչի դիմաց է Ավինյանը «քուչի տղա» Աղաջանյանին նշանակել աղբահանության պետ

Վերջին շրջանում աղբահանության խնդրի շուրջ մեծ աղմուկ է բարձրացրել. Քաղաքապետարանում «հայտնաբերել են», որ աղբը ժամանակին չեն տանում, քանի որ աղբատարները շարքից դուրս են եկել։

NEWSPRESS.am-ը բազմիցս է անդրադարձել նրան, որ աղբահանության մեքենաներն ու ջրցանները շարքից դուրս են եկել ու այդ ամենին տեր կանգնող չկա, որ   աղբահանության ՊՈԱԿ-ի տնօրեն Հովհաննես Մանուկյանը վատնում է ՊՈԱԿ-ի բյուջեն ու հրապարակել այն մասին, որ ՊՈԱԿ–ում բազում խնդիրներ կան, սակայն իշխանությունների կողմից 0 արձագանք։

Հիմա արդեն, երբ ՊՈԱԿ–ի բյուջեն քամուն  տված ու աղբահանությունը հորով-մորով արած Մանունկյանին տեղափոխել են ավտոպարկ ու նրա փոխարեն բերել մեկ այլ տնօրենի` Բագրատ Աղաջանյանին, աղբահանության խնդիրը սկսել է գլուխ բարձրացնել ու իր մասին «խոսել տալ»։

Անգամ դեպի Երևանի քաղաքապետի պաշտոնի «լուսավոր ու պանծալի ապագա» սլացող փոխքաղաքապետ Ավինյանն է խոստովանել, որ աղբահանության վիճակը սրվել է։

Խոստովանելը` խոստովանել է, բայց դրանից վիճակը չի բարելավվում ու Ավինյանն էլ խոսուն քայլեր չի ձեռնարկում։

Անգամ այն բանից հետո, երբ մամուլում լուրեր տարածվեցին, որ նորանշանակ տնօրեն  Բագրատ Աղաջանյանը ոչ միայն իր գործով չի զբավում ու քաղաքը կեղտի մեջ է թողել, այլև խփում ու սպառնում է աշխատողներին` Ավինյանը մատը մատին չտվեց` իրականությունը պարզելու և մեղավորին պատժելու համար։ 

Օրերս NEWSPRESS.am-ը ևս ահազանգ ստացավ այն մասին, որ տնօրենը վարորդին նեղացրել է։ Իսկ ավելի կոնկրետ Աղաջանյանը սպառնացել է վարորդին (անունը և մեքենայի համարը դեռևս չենք նշի) ասելով թե` «եթե երկրորդ ռեյս չաշխատես` աշխատանքից կազատեմ»։

Այսինքն խնդիրը լուծելու փոխարեն` տնօրենը ստրուկների նման է վերաբերվում աշխատողներին` նրանց ստիպելով աշխատել միանգամից մի քանի աշխատողի փոխարեն` առանց հավելավճարի ու առանց նորմալ աշխատող մեքենաների։

Դրա պատճառով, աշխատողներն իրենք են մեկը մյուսի հետևից ազատման դիմումներ գրում։

Հարկ է նկատել, որ մինչ տնօրեն աշխատելը, Աղաջանյանը նույն ՊՈԱԿ–ում զբաղեցրել է սանմաքրման պետի պաշտոնը։

Միայն այն բանի համար, որ նա իր գործը պատշաճ չի կատարել ու աջ ու ձախ հայհոյել և կռիվներ է սարքել հիմնարկում, նախկին տնօրենը նրան աշխատանքից ազատել է։

Ու հարց է ծագում, թե այդ ինչպես վատ վարքի տեր ու, մեղմ ասած, բացասական բնութագրով Աղաջանյանը հանկարծ, ոչ ավել–ոչ պակաս, դարձավ տնօրեն։

NEWSPRESS.am–ի աբյուրները վստահեցնում են, որ Տիգրան Ավինյանի ու Աղաջանյանի միջև գործարք կա։

Մեր տեղեկություններով, իրականում Աղաջանյանը, ինչպես ասում են,  որպես «քուչի տղա», Ավինյանին քաղաքապետ դառնալու համար, խոստացել է 20 000 (քսան հազար) ձայն (քվե)։

Թե որտեղից, ինչպես ու ում հաշվին նա կապահովի այդ ձայները` այս պահին էական չէ։ Այստեղ խնդիրն այն է, որ իրեն խոստացված ձայների ու քաղաքապետի բաղձալի պաշտոնի համար, Ավինյանը պատրաստ է հոգին վաճառել։ Այս դեպքում խաթվածահար անել ամբողջ քաղաքը` կորցնելով այն աղբի մեջ ու թքած ունենալով Երևանի և երևանցիների վրա։

Արմինե Մկրտումյան