Ավինյանի ֆոտոսեսիաներն ու սելֆիները՝ չորացող զբոսայգիներից, ջարդված կարուսելներից ու սղարաններից հեռու (լուսանկարներ)

Թբիլիսյան խճուղու սկզբնամասում, իսկ ավելի կոնկրետ՝ Քանաքեռ-Զեյթուն վարչական շրջանում գտնվող Պարույր Սևակ և Զաքարիա Քանաքեռցի փողոցների խաչմերուկի անկյունում «ծվարած» հանգստի գոտին ամբողջությամբ մատնվել է, բառի բուն իմաստով, անտերության:

«Նախկիններից» դեռևս Երևանի քաղաքապետ Տարոն Մարգարյանի օրոք զբոսայգին բարեկարգվել և համալրվել էր սպորտային ժամանակակից սարքավորումներով: Այգում կառուցվել է նաև մանկական խաղահրապարակ:

Անկեղծ լինելու համար, պետք է նշենք, որ այգին ժամանակին մաքրվում էր, թփերն ու ծառերն էտվում էին, խոտը հնձվում էր ու ջրվում, ինչի արդյունքում հանգստյան գոտին թարմ էր, կանաչ ու հաճելի:

Իսկ երբ մանկական խաղահրապարակից որևէ սարք վնասվում էր՝ անմիջապես այն վերանորոգվում էր:

Պատկերը հեղափոխվեց «թավշասեր քայլարածների» իշխանության գալուց անմիջապես հետո:

Այգին նախկին տեսքը չունի՝ գազոնը չի խնամվում, երկար ժամանակ չջրվելու հետևանքով ծառերը վնասվել են, չորացել, տերևները՝ գունաթափվել, խոտը չորացել է:

Չեն բարեկարգվում ու նորացվում նաև վնասված ու կոտրված սարքերը:

Այս խնդրին NEWSPRESS.am-ն էլի է անդրադարձել:

Մի առավոտ, երբ կանաչապատման աշխատակիցներն այգու տաղավարում նստած թեժ զրույցի էին բռնվել, մեզ հետ զրույցում ասացին, թե՝ ջուր չեն տալիս, իրենք էլ չեն ջրում:

«Մենք ի՞նչ անենք, աղջիկ ջան: Եկել ենք, մաքրում ենք, ինչը որ հնարավոր ա, բայց ջուր չեն տալիս, ո՞նց ջրենք. մեզնից ինչ կախված ա՝ անում ենք»,- ասաց կանաչապատողներից մեկը, մյուսները՝ հաստատեցին:

Իհարկե, պարզ չէ, թե «ինչ է հասնում իրենցից», երբ այգին անմշակ է, իսկ աշխատողները՝ տաղավարում նստած:

Մյուս կողմից էլ սա նաև քաղաքային իշխանության, այս դեպքում, քաղաքապետի լիազորություններն իրեն վերագրած փոխքաղաքապետ Տիգրան Ավինյանի գործառույթում է, ու պատասխանատվությունը նրա վրա է:

Մինչ Ավինյանը ժապավեններ է կտրում, նախկինների աշխատանքն «իրենով անում», սպիտակ վերնաշապիկով ու տաբատով հայտնվում շինհրապարակներում, ֆոտոսեսիաներ անցկացնում, մետրոյի կանգառներ կառուցելու մասին մտքեր նետում օդ՝ մայրաքաղաքի իրական խնդիրները մնում են ստվերում ու ավելի են խորանում:

Ի դեպ, այս այգու խնդիրը «կիսում են» քաղաքի այլ զբոսայգիներ ևս:

Ֆոտոսեսիաների ու սելֆիների սիրահար, դեպի քաղաքապետի պաշտոնը սլացող Ավինյանին հետաքրքիր կլիներ տեսնել չորացող այգիներում՝ մանկական կոտրված, ջարդված կարուսելների ու սղարանների ֆոնին, թե՞ համարձակությունը չի ների...

Արմինե Մկրտումյան