Խաչատուր Սուքիասյանի դեմ հայցը սկսել են զրոյից քննել․ «Հրապարակ»

«Հրապարակ» թերթը գրում է․ 

«ՀՀ 3-րդ նախագահ Սերժ Սարգսյանի՝ ընդդեմ ԱԺ ՔՊ-ական պատգամավոր Խաչատուր Սուքիասյանի ներկայացրած հայցը զրոյից են սկսել քննել։ Հիշեցնենք, որ Սերժ Սարգսյանը Սուքիասյանին դատի էր տվել՝ զրպարտություն հանդիսացող փաստացի տվյալները հրապարակայնորեն հերքելու և պատվին ու արժանապատվությանը պատճառված վնասը հատուցելու պահանջով։ Նախկին նախագահը ՔՊ-ական պատգամավորին դատի էր տվել, քանի որ վերջինս ԱԺ ամբիոնից հայտարարել էր, թե  Սարգսյանը 100 միլիոն դոլարից ավելի գումար «կազինոներում կրվել է, նույն Բադեն-Բադեններում»:

Նրա պնդմամբ` կազինոյում մսխվել են բանակի և պետության այլ ծախսերի համար նախատեսված գումարները` լայնամասշտաբ կոռուպցիա է եղել։ Հայցադիմումը դատարան էր մտել 2021 թ. սեպտեմբերի 6-ին և մակագրվել դատավոր Սերգեյ Սահակյանին, սեպտեմբերի 15-ին դատավորը հայցադիմումը վարույթ էր ընդունել։ 2022 թ. հունվարի 17-ին ապացուցման բեռի բաշխում էր արել՝ արձանագրելով, որ Սուքիասյանը պետք է ապացուցի իր հայտարարության ճշմարտացիությունը, ինչպես նաև, որ այդ հայտարարությունը պայմանավորված էր գերակա հանրային շահով: Այնուհետ դատարանն իր որոշման մեջ փոփոխություն է կատարել՝ լրացնելով այն, և Սուքիասյանին պարտավորեցնելով, որ վերջինս ապացուցի, որ «բոլորդ լավ գիտեք՝ երրորդ նախագահը 100 միլիոն դոլարից ավել կազինոներում կրվել ա, նույն Բադեն-Բադենում» արտահայտությունը հիմնված է բավարար փաստական կազմի վրա։

2022 թ. մայիսի 4-ին դատարանն ավարտել էր նախնական լսումների փուլը և անցել գործի բուն քննությանը։ Դրանից հետո մեկ նիստ է կայացել, երկու նիստ չի կայացել՝ դատավորի վատառողջ լինելու պատճառով, իսկ 2023 թ. մայիսին դատավորին տեղափոխել են Վերաքննիչ դատարան, և հունիսի 14-ին գործը տեղափոխվել է այլ դատարան ու մակագրվել դատավոր Կիմա Արզումանյանին: Նա էլ հունիսի 22-ին գործը վարույթ է ընդունել և նախնական դատական նիստ նշանակել՝ արձանագրելով, որ հայցադիմումի քննությունը սկսում է ամենասկզբից»։