Առևտո՞ւր, թե՞ խարդախություն․ հանցավոր խմբակն զբաղվում է խաբեությամբ․ հրավիրում ենք ՊԵԿ-ի ուշադրությունը (լուսանկարներ)

Համացանցը լցված է տարատեսակ գովազդներով, որտեղ սա ու նա իրենց ծառայությունն են առաջարկում կամ ինչ-որ ապրանք վաճառում՝ ինձ ու ձեզ նման միամիտներին։

Իսկ ինչու միամիտ․ քանի որ երբ գնում ես հետքով ու փորձում որևէ իր պատվիրել, պարզվում է՝ գործ ունես ամենասովորական խարդախության ու խաբեության հետ։

Այսպես, օրինակ, Exito TV Shop անվան ներքո սոցցանցային տիրույթում ինչ-որ մի խմբակ վաճառք է իրականացնում։

Այս խմբակի վաճառած ապրանքները ոչ միայն իրենց ներկայացրած գովազդի հետ ընդհանրապես կապ չունեն, այլև գրանցված չեն որպես առցանց (online) վաճառքով զբաղվող ընկերություն։

Օրինակ՝ մինի կարի մեքենան նրանց գովազդած ապրանքներից մեկն է։ 

Ապրանքի գովազդի մեծ մասը խաբեություն է։

Մասնավորապես․ գովազդի մեջ տեղադրված նախնական տեսանյութում առկա էին նաև թելեր, ասեղ թելելու համար հարմարավատ փոքր սարք ու նաև կարի մեքենային կցելու տախտակ և չափամետր։

Սակայն, երբ ապրանքը եկավ, պարզվեց, որ նման բաներ մեքենայի հետ չկան։ Էլ չենք խոսում այն մասին, որ խմբակը գումարի վճարման կտրոն չի դրամադրում, քանի որ գրանցված չէ։

Շատ դժվարությամբ, բայց ի վերջո հաջողվեց կապ հաստատել խմբակի անդամներից ինչ-որ մեկի հետ, վերջինս այլ համար ուղարկեց և խնդրեց ուղարկել տեսանյութը։

Այն ուղարկելուց հետո ասաց, թե դա իրենց տեսանյութը չէ։ Իսկ դիտարկմանը, որ հենց այդ տեսանյութն էր կցված գովազդին, վերջինս հերքեց։ Երբ նորից մտանք էջ՝ տեսանյութն իսկապես այլևս չկար։ Փոխարենը խարդախությամբ զբաղվող խմբակը մոռացել էր հանել թելող սարքի ու նաև մեքենային հարմարեցվող տախտակի նկարը, որը ներկայացնում ենք ստորև։ 

Ի դեպ, եթե փորձես պատվիրել «վաճառքում մնացած 8 մեքենայից» մեկը, կամ անգամ նշված բոլոր 8 մեքենան, դրանից այդ թիվը ընդհանրապես չի նվազի։

Հարկ է նկատել նաև, որ այս խմբակը չունի նաև կոնկրետ հասցե։ Համենայնդեպս, երբ ցանկացանք ճշտել հասցեն՝ նրանց այցելելու համար, ասացին, որ «կոնկրետ տեղ չունենք նստելու»։

Ի դեպ, կարի մեքենայի գինը ևս անիրական էր՝ մոտ 37 000 (37 հազար) դրամ։

Սա այն դեպքում, երբ հայտնի Wildberries-ը ճիշտ և ճիշտ նույն մեքենաներն անհավանական ցածր գնով է վաճառում։

NEWSPRESS.am-ը ներկայացնում է Wildberries-ի կողմից առաջարկվող մի քանի գնային տարբերակ։  

Մի խոսքով՝ պատկան մարմինների, իսկ ավելի կոնկրետ Պետական եկամուտների կոմիտեի (ՊԵԿ) ուշադրությունն ենք հրավիրում հիշյալ ենթադրյալ հանցախմբի վրա։

NEWSPRESS.am—ը հետևողական կլինի բացահայտելու, թե ինչպես է գործում այս շղթան ու ովքեր կանգնած խարդախության հետևում։

Ի դեպ, ունենք նաև հեռախոսազրույցների ձայնագրությունները։

Արմինե Մկրտումյան