Բենզինի գնի համար կառավարության հանգստությունն ու անհանգստությունը

«Ամբողջ աշխարհում վառելիքի գինն իջել է, իսկ Հայաստանում շարունակում է մնալ բարձր, օրինակ՝ Ռուսաստանում իջել է 33 տոկոսով, Չեխիայում՝ 20, Գերմանիայում ու Ֆրանսիայում՝ 18:Նոյեմբերյանում մարդիկ նույնիսկ վտանգավոր ճանապարհներով են անցնում, որպեսզի Վրաստանում լիցքավորեն իրենց մեքենաներն ու վերադառնան Հայաստան»,- այս հարցը ՀԱԿ պատգամավոր Լևոն Զուրաբյանը ուղղեց կառավարությանը:

Պատգամավորի կարծիքով դիտավորյալ ստեղծված մենաշնորհային վիճակի պատճառով այսօր Հայաստանի ամբողջ տնտեսությունը խեղդվում է:

Փոխվարչապետ Վաչե Գաբրիելյանը բենզինի գնի վերաբերյալ ասաց, որ այդ հարցը ևս կարևոր է և անհանգստացնում է նաև կառավարությանը: Նա նշեց, որ կառավարությունը դիմել է ՏՄՊՊՀ-ին և պատասխանը ստանալուց հետո կհրապարակեն:

Գազի պայմանագրի վերաբերյալ էլ Վաչե Գաբրիելյանը նշեց, թե դիմել են ՌԴ և այդ ուղղությամբ բանակցություններ են տարվում:

Լևոն Զուրաբյանը ներկայացրեց Հայաստան բենզին ներկրողների թիվը, որ տարիների ընթացքում գնալով նվազել է, ու այսօր ընդամենը մեկն է ներկրողը։

«Պատասխանն ակնհայտ է, որ ամբողջ խնդիրը մենաշնորհից է գալիս: Մենք տեղեկություն ունենք, որ բենզինի գինը քաղաքական կամքի արդյունքում է որոշվում և սպասարկում է այն մարդկանց, որոնք գերշահույթ են ստանում»,- ասաց նա և նշեց, որ ՀԱԿ-ը որոշում է ընդունել պաշտոնական հարցապնդումով դիմել կառավարությանը։