Մակրոնի համեստությունը զիջում է միայն նրա տղամարդկությանը. Զախարովան մեկնաբանել է Մակրոնի դերը ԼՂ հակամարտության կարգավորման հարցում

Ֆրանսիայի նախագահ Էմանուել Մակրոնի հայտարարությունները` կապված ղարաբաղյան կարգավորման հարցում սեփական դերի հետ, ոչ մի արդյունքներով չեն ամրապնդվում: Այս մասին հայտարարել է Ռուսաստանի ԱԳՆ ներկայացուցիչ Զախարովան։ Նրա կարծիքով` Փարիզը վարկաբեկել է Ֆրանսիայի՝ որպես միջնորդի դերը հայ-ադրբեջանական հարաբերությունների կարգավորման գործում:

«Նման հայտարարություններից հետո տպավորություն է ստեղծվում, որ նախագահ Մակրոնի համեստությունը զիջում է միայն նրա տղամարդկությանը։ Մենք, իհարկե, չենք դադարում զարմանալ Ֆրանսիայի նախագահի այդ հատկանիշների վրա, թե ինչ պաթոսով է նա խոսում իր դերի, Լեռնային Ղարաբաղի հակամարտության կարգավորման մեջ արժանիքների մասին և այլ հարցերում նույնպես»,- ասել Է Զախարովան։

Նա նշեց, որ Մակրոնը ոչինչ չի ասել նման արդյունավետ աշխատանքի գործնական արդյունքների մասին։

«Հնարավոր է՝ չի ասել, քանի որ այդ արդյունքները ոչ ոք երբևէ չի տեսել»,- նշել է ՌԴ ԱԳՆ ներկայացուցիչը՝ մատնանշելով, որ դա վերաբերում է նաև շատ այլ գործերի, որոնք ստանձնել Է Մակրոնը:

Նրա խոսքով՝ Մոսկվան վաղուց պատրանքներ չունի, թե Ֆրանսիան կարող է ներդրում ունենալ Լեռնային Ղարաբաղի բարդ խնդիրների լուծման գործում։

«2022 թվականին աշխատանքը սաբոտաժ անելը, իսկ, ըստ էության, փլուզելը, այդ թվում՝ Փարիզի, ԵԱՀԿ Մինսկի խմբի ջանքերով, անցյալ տարվա աշնանը Ֆրանսիայի Ազգային ժողովի և Սենատի կողմից «Ադրբեջանի ագրեսիան» դատապարտող (ինչպես իրենք են գրել) բանաձևի ընդունումը և երկրի ու նրա պաշտոնատար անձանց դեմ պատժամիջոցներ սահմանելու պահանջը, կասկածելի մանդատով և առանց Ադրբեջանի կարծիքը հաշվի առնելու Հայաստանում քաղաքացիական առաքելություն ծավալելու մասին Փարիզի կողմից որոշում նախաձեռնելը, այս տարածաշրջանային հակամարտության մեջ, այս ամենը վառ օրինակն են այն բանի, թե Ֆրանսիան ինչ օրակարգ ունի այս տարածաշրջանային հակամարտությունում, որը պահանջում է գիտելիքներ, պրոֆեսիոնալիզմ և գործողությունների ճշտություն»,- ընդգծել է Զախարովան։

Նրա խոսքով՝ այդ բոլոր գործողություններն ուղղված են ոչ թե կողմերին օգնելուն, այլ Ռուսաստանին դուրս մղելուն և սեփական քաղաքական, երբեմն նաև նախընտրական նպատակների իրականացմանը: Դրանք, Զախարովայի տեսանկյունից, ոչ միայն դրական արդյունք չտվեցին բանակցային գործընթացին, այլ հակառակը՝ վարկաբեկեցին Ֆրանսիայի միջնորդական դերը հայ-ադրբեջանական հարաբերությունների կարգավորման գործում: