Ճնշումների տակ բանակցություն չի կարող լինել. եթե ճանապարհ են փակում, ինչպես կարող ենք հասկանալ, որ ադրբեջանական կողմն այդ երկխոսությանը պատրաստ է. ԱՀ ԱԳՆ

Արցախյան կողմն ամենից շահագրգիռն է իրական երկխոսության մեջ, բայց որպեսզի այդ երկխոսությունը կառուցողական բնույթ ունենա, պետք է համապատասխանի որոշ չափորոշիչների։ Այս մասին Ստեփանակերտ-Երևան հեռուստակամուրջ-ասուլիսի ընթացքում հայտարարեց Արցախի Հանրապետության արտաքին գործերի նախարար Սերգեյ Ղազարյանը։

«Այս ընթացքում Արցախի ԱԳՆ-ն տարբեր առաջարկներ է ստացել երրորդ երկրների ներկայացուցիչներից և միջազգային կազմակերպություններից՝ նման հանդիպումներ կազմակերպելու մասին»,- ասաց նախարարը։

Սերգեյ Ղազարյանը նշեց, որ այս տարվա փետրվարի 24-ին և մարտի 1-ին նմանատիպ հանդիպումներ տեղի են ունեցել ռուս խաղաղապահների միջնորդությամբ՝ նրանց տեղակայման վայրում։

«Քննարկվել են տեխնիկական հարցեր, սակայն ադրբեջանական կողմն ամբողջությամբ խեղաթյուրեց այդ հանդիպումների իմաստը՝ ներկայացնելով այն իբր վերաինտեգրման շուրջ բանակցությունների մեկնարկ։ Ճնշումների տակ բանակցություն կամ երկխոսություն չի կարող լինել։ Եթե նրանք ճանապարհ են փակում, մենք ինչպես կարող ենք հասկանալ, որ ադրբեջանական կողմն այդ երկխոսությանը պատրաստ է»,- ասաց նախարարը՝ հավելելով, որ արցախյան կողմը խաղաղապահների միջոցով ադրբեջանական կողմին հանդիպումների մասին բազմաթիվ առաջարկներ է փոխանցել, որոնք մերժվել են։