Կա՛մ Ավինյանին են հիմարացնում, կա՛մ նա է հիմարի տեղ դնում. Տիգրան Ավինյանը բռնել է Մարությանի և Սարգսյանի վատահամբավ ուղին. Հյուսիս-հարավի հետքերով (տեսանյութ)

Երևանը մի քաղաք է, որի փաստացի քաղաքապետը խոսում է ասֆալտի փոքրիկ փոսերից՝ միաժամանակ անտեսելով շատ ավելի մեծ մասշտաբի, տարիներ շարունակ ձգձգվող ճանապարհաշինարարությունը, որը մինչև իսկ մարմնական վնասվածքներ է հասցնում քաղաքացիներին: 

Երևանը քաղաք է, որը 3 քաղաքապետ է փոխում, բայց մեկ խնդիրը չեն կարողանում լուծել: 

Ի մասնավորի. Հյուսիս-հարավ ավտոճանապարհին Բաբաջանյան փողոցի Բ4 թաղամասի ավտոտնակներն սկսեցին քանդել 2020-ի փետրվարի 10-ին, այլ՝ փորման աշխատանքները շատ ավելի վաղ էին մեկնարկել: 

Թաղամասի բնակիչներն այդ օրը հենց բողոքի ակցիա էին կազմակերպել՝ արդարացիորեն դժգոհելով, թե մայրուղին շենքերին շատ մոտ է անցնում, ինչ է լինելու սեյսմանվտանգության հարցը, թաղամասից դուրս եկող ճանապարհը որտեղով է անցնելու, հետիոտնն ինչպես է փողոցը հատելու և այլն: 

Ոստիկանական ուժերով միայն հաջողվեց ցրել ցուցարարներին ու, ի հեճուկս բնակիչների բողոքների, քանդման աշխատանքներն սկսվեցին: Քաղաքապետն այդ ժամանակ թեև Հայկ Մարությանն էր, բայց աշխատանքներով զբաղվում էր այնժամանակվա փոխքաղաքապետ Հրաչյա Սարգսյանը:

Որոշ բնակիչների հետ բազում-բազմաթիվ խնդիրները չհաղթահարած, բայց զոռին տալով, շինաշխատանքները մեկնարկած քաղաքապետարանն ինքը կանգնեց խնդրի առաջ՝ միաժամանակ անհարմարություն պատճառով արդեն ամբողջ թաղամասի բնակչությանը: 

Պանդեմիան էր, հետո պատերազմը, բայց դրանք իբրև ժամանակային կորստի «մահանա» քաղաքապետարանը բերել չի կարող, որովհետև աշխատանքները քչից-շատից շարունակվում էին: Ինչևէ, Հայկ Մարությանը հեռացավ անժամանակ ու նրան չհաջողվեց կտրել կարմիր ժապավենը:

2022-ի ամռանը, երբ շինարարությունը շարունակվում, անհաշվելի անհարմարություններ էր պատճառում, փոշի ու կեղտ լցնում բնակիչների տներ արդեն 2.5 տարի, այնժամանակվա փոխվարչապետ Համբարձում Մաթևոսյանը խորհրդակցություն էր անցկացվում: Արդյունքներով նշվում էր, որ Բաբաջանյան-Աշտարակ ճանապարհահատվածը շահագործման կհանձնվի 2022-ի տարեվերջին:

Իսկ 2022-ի տարեվերջին, այդ ճանապարհի հետ կապված միակ բանը, որ տեղի ունեցավ, այն էր, որ Հրաչյա Սարգսյանն արդեն իբրև քաղաքապետ էր գնալու ճանապարհի այդ հատված, լուսանկարվելու-տեսանկարահանվելու, ու ոչ միայն նա: Տեսարանն ապահովելու համար ներգրավվելու էին բազում-բազմաթիվ շինարարներ, ովքեր իբրև թե օրուգիշեր աշխատում ու ջանք չեն խնայում, ինչպես նաև բազմաքանակ աշխատող տեխնիկա:

Լուսանկարում Քաղաքային կայուն զարգացման ներդրումային ծրագրի ղեկավար Նորա Մարտիրոսյանն է, ով եկել էր աչքալուսանք տալու՝ աշխատանքների ավարտի 2022-ի տարեվերջը տեղափոխվել է 2023-ի հունիս:

2023-ի հունիսը եկել ու նույնիսկ գնում է, իսկ տիկնոջ խոստացած ավարտը նորից չկա: 

Հիմա արդեն Երևանը փաստացի ղեկավարում է մեկը, որին ոչ մի երևանցի քվե չի տվել՝ նույնիսկ որպես ավագանու անդամ: Այս՝ չընտրված քաղաքապետ աշխատող փոխքաղաքապետը,  շարունակում է Հայկ Մարությանի ու Հրաչյա Սարգսյանի մուննաթ գործելաոճը: Ամենահայտնին, թերևս, փոսերի հետ կապված մուննաթի պատմությունն է: 

Հիմա Բաբաջանյան փողոցի այդ հատվածի շինարարությունն իսկական քննություն է Ավինյան Տիգրան համար՝ ապացուցելու այդ թաղամասի շուրջ 1500 ընտրողին, որ ինքն ուղղակի նախընտրական քարոզարշավ չի անում, այլ իրապես աշխատում է: Բայց քանի դեռ այդ հատվածով տարբեր օրերի անցնելիս 3-4 շինարար էլ չի լինում, նշանակում է, որ կա՛մ նրան են հիմարացնում, կա՛մ նա է քաղաքացիներին հիմարի տեղ դրել:

Ամենայն հավանականությամբ, հենց երկրորդը, քանի որ եթե Ավինյանն իսկապես սրտացավ լիներ, գոնե մեկ անգամ կլիներ այդ հատվածում, կզրուցեր բնակիչների հետ կլսեր նրանց խնդիրները ու մի բան էլ ներողություն կխնդրեր: Իսկ այժմ հետիոտնների համար հատվածում մարդիկ սահում ու ընկնում են այնպես, ինչպես, ասենք, սառույցին սահելիս կընկնեին: 

Ստորև ներկայացված տեսանյութը նկարահանված է այսօր՝ հունիսի վերջին օրը՝ 30-ին: Առանց խոսքերի էլ, տեսանելի է, որ շինարարները 2-3 հոգի էին, ովքեր դժվար թե այս տեմպերով մինչև արդեն 2023-ի տարեվերջ ավարտին հասցնեն այս չարաբաստիկ ճանապարհը: Բնակիչների համար 3,5 տարի ձգձգվող այս մղձավանջին NEWSPRESS.am-ը շարունակելու է ուշադրությամբ հետևել: Հետևել նաև, թե երբ է Տիգրան Ավինյանը հաճելու ժամանել այնտեղ:

Միգուցե սեպտեմբերի 17-ին՝ ընտրություններին ընդառա՞ջ...

NEWSPRESS.am