Լենինգրադում սպանված հայ տղամարդու դին 2 օրից կտեղափոխվի հայրենի գյուղ

Ռուսաստանի Լենինգրադի երկրամասում, Շլիսելբուրգի ավտոսերվիսում փոխհրաձգության հետևանքով սպանվածներից մեկը Լոռու մարզի Կաթնաջուր գյուղից է:

Նա 60 ամյա Հրայր Վարդանյանն է:

«Նրա ընտանիքը տարիներ շարունակ պարբերաբար մեկնել է Ռուսասատան` արտագնա աշխատանքի: Այնտեղ մշտական բնակություն չեն հաստատել: Առևտուր էին անում»,- այս մասին newspress.am-ի հետ զրույցում ասաց Կաթնաջուրի գյուղապետ Արմեն Պապոյանը:
Նրա խոսքով` Վարդանյանների ընտանիքը անկայուն վարքագծով աչքի չի ընկել և չի կարող ասել, թե ինչու է նման դեպք պատահել:
Գյուղապետը չմանրամասնեց նաև, թե ինչ պայմաններում է տեղի ունեցել փոխհրաձգությունը` ընդգծելով, որ խոսակցությունները տարբեր են և դեռևս հստակ տեղեկություններ չունի կատարվածի մասին:

Նրա տեղեկացմամբ` վերջին անգամ Հրայր Վարդանյանը աշնանն է մեկնել Ռուսասատան:
«Կինը սպանության ժամանակ գյուղում է եղել: Երևի նա էլ տեղյակ չէ կատարվածի մանրամասներին: Ամեն դեպքում խորհուրդ չեմ տա նրա հետ խոսեք: Առանց այն էլ հիվանդ է ու շատ ծանր է տանում ամուսնու մահը: Չէ, չէ… հանկարծ նրան չզանգեք»,- ասաց գյուղապետը:

Արմեն Պապոյանը հայտնեց նաև, որ Վարդանյանի դիակը կտեղափոխվի Հայաստան և  երկու օրից արդեն գյուղում կլինի:

Ավելի վաղ տեղեկացրել էինք, որ 2016թ. հունվարի 31-ին, երեկոյան ժամը 20:00-ի սահմաններում: Ավտոսերվիսի հարեւանությամբ գտնվող ավտոտնակներին է մոտեցել սեւ Mercedes՝ 444 համարանիշով: Մեքենայից կովկասյան արտաքինով 5 անձ է իջել: Ականատեսի պատմելով՝ սրահում գտնվողները եւս զինված են եղել:
Պարզվել է, որ հրաձգության հետեւանքով սպանվել են 60-ամյա Հրայր Վարդանյանը եւ 45-ամյա Արմեն Խուրշուդյանը: Եվս 3 մարդ վիրավորվել է: