Մեր կառավարությունը, առերեսվելով բոլոր դժվարությունների հետ, շարունակելու է խաղաղության քաղաքական ուղեգիծը. Փաշինյան (տեսանյութ)

Նիկոլ Փաշինյանն այսօր՝ հունիսի 29-ին, կառավարության նիստին անդրադարձավ Լաչինի միջանցքի փակմանը և դրա հետևանքով առաջացած խնդիրներին։

Նա նշեց, որ Լաչինի միջանցքի փակման հետևանքով ԼՂ-ում առաջացած հումանիտար ճգնաժամի պայմաններում հունիսի 27-ին Ադրբեջանի Զինված ուժերը հրետանային և անօդաչու ավիացիայի հարվածներ են հասցրել ԼՂ ՊԲ Մարտունու և Մարտակերտի դիրքերի ուղղությամբ, ինչի հետևանքով ՊԲ 4 զինծառայող է զոհվել։ 

Փաշինյանը վստահեցրեց, որ ԵԽԽՎ-ն չափազանց անհանգստացած է Ադրբեջանի ղեկավարության ամենաբարձր մակարդակում հայերի դեմ կիրառվող թշնամական և սպառնալից հռետորաբանությունից: Կոչ է անում Ադրբեջանին մերժել նման հռետորաբանությունը և քայլեր ձեռնարկել ինչպես ատելության խոսքի դեմ, այդ թվում հանրային և բարձրաստիճան պաշտոնյաների կողմից կիրառվող, այնպես էլ ատելության հանցագործությունների դեմ պայքարելու համար։

Վերադառնալով հունիսի 28-ի սադրանքին, Փաշինյանն ընդգծեց, որ դրա նպատակը ՀՀ-ի և Ադրբեջանի միջև խաղաղություն հաստատելու, ԼՂ-ի ժողովրդի իրավունքների և անվտանգության հարցերը հասցեագրելու ջանքերը չեզոքացնելն է:

«Այս օրերին ՀՀ պատվիրակությունը ԱԳ նախարարի գլխավորությամբ Վաշինգտոնում շարունակում է բանակցություններն Ադրբեջանի պատվիրակության հետ՝ խաղաղության պայմանագրի տեքստը համաձայնեցնելու ուղղությամբ։ Մեր տարածաշրջանում խաղաղությունն այլընտրանք չունի և մեր կառավարությունը, առերեսվելով բոլոր դժվարությունների հետ, շարունակելու է խաղաղության քաղաքական ուղեգիծը»,-ասաց նա: