Այս իրավիճակը կարող է փոխվել, եթե Հայաստանում լինի պայքար, ժողովուրդը դառնա գործոն. Իշխան Սաղաթելյան

Ռուսաստանի դեսպանատնից արձագանք կա. առաջիկա ժամերին մեր ակցիայի մասնակիցների կողմից մեր պահանջը գրավոր կփոխանցենք, իրենց պատրաստակամություն հայտնել են դուրս գան և վերցնեն: Այս մասին այսօր ՀՅԴ-ի կողմից հայտարարված 24-ժամյա նստացույցի ժամանակ ասաց ԳՄ ներկայացուցիչ Իշխան Սաղաթելյանը:

«Ակցիան կարևոր էր միաժամանակ ԵԱՀԿ Մինսկի երկրների և Եվրամիության ներկայացուցչության դիմաց և հնարավորություն էր մեր բողոքի ձայնը բարձրաձայնելու, մեկ անգամ ևս արձանագրելու, որ Արցախը կանգնած է էթնիկ զտման և ցեղասպանության առջև, իսկ վերջին 10 օրվա ընթացքում խորը բլոկադայի մեջ է: Միջազգային հանրությունը լուռ շարունակում է առաջնորդվել երկակի ստանդարտներով, բավարարվում է լոկ հայտարարություններով, ընդունվում են բանաձևեր, դատարանի որոշումներ, որոնք մնում են թղթի վրա, իսկ դրան չի հետևում միջազգային հանրության հստակ գործողությունները»,- ասաց նա: 

Սաղաթելյանի խոսքով՝ եթե սանկցիաներ չեն կիրառվում Ադրբեջանի դեմ, ուրեմն իրենք հեռու են այն սկզբունքներից, որոնց մասին հայտարարում են և լուռ հետևում են՝ ինչպես է 120.000 մարդ իր սեփական հայրենիքում ենթարկվում էթնիկ զտման և ցեղասպանության:

Սաղաթելյանը նշեց, որ Հայաստանի օրվա իշխանության վարած քաղաքականությունը ևս նպաստում է այդ ամենին. «Հայաստանի իշխանությունն ամեն անգամ նոր լեգիտիմություն և գործիքակազմ է տալիս Էրդողանին և Ալիևին՝ թուրք-ադրբեջանական տանդեմին հայ ժողովրդի դեմ նոր վայրագություններ իրականացնելու համար: Այս իրավիճակը կարող է փոխվել, եթե Հայաստանում լինի պայքար, ժողովուրդը դառնա գործոն, միջազգային հանրությունը՝ մեր բարեկամ և ոչ բարեկամ երկրները, այդ թվում՝ թշնամի երկրները, հասկանան, որ այստեղ կա ժողովուրդ, որը կառչած է իր հայրենիքից և պատրաստ է պայքարել այդ հայրենիքի համար»: