Կմտնենք ԱԺ, ու իրենց պատգամավորները կքվեարկեն այս նախագծի օգտին. «Հրապարակ»

«Հրապարակ»-ը գրում է.

«Իշխանության գործելաոճն ինձ համար անակնկալ չէր, եւ ես կարծում եմ, որ այս իշխանությունն այնքան խուճապի մեջ է, որ բացարձակ ոտք է դրել ապօրինության ճանապարհին»,- «Հրապարակի» հետ զրույցում ասաց «Հայաքվե» նախաձեռնության համակարգող Ավետիք Չալաբյանը։

«Ես կպատկերացնեի՝ մանր խոչընդոտներով ու ամեն օր այստեղից- այնտեղից մի բան անելով խանգարել, մի օր այս անել, այն անել, բայց իրենք գնացել են բացահայտ խոչընդոտելու ճանապարհով, որովհետեւ խուճապի մեջ են։ Իրենք հասկանում են, որ ամբողջ հանրապետությունը հիմա սկսել է համակվել «Հայաքվեի» ոգով, ամբողջ մեր երկիրը սկսել է համակվել մեր ազգային արժանապատվությունը վերականգնելու ոգով։ Ու իրենք խուճապի մեջ են, իրենք հասկանում են, որ մենք ոչ միայն 50 հազար ստորագրություն կհավաքենք, մենք կհավաքենք, կմտնենք Ազգային ժողով ու կանցկացնենք այս օրենքի նախագիծը։ Իրենց սեփական պատգամավորները կքվեարկեն այս օրենքի նախագծին կողմ»,- ասաց Չալաբյանը։

Հարցին, թե ինչու է այդքան վստահ, որ ՔՊ-ական պատգամավորների շարքում կլինեն այնպիսի մարդիկ, ովքեր կողմ կքվեարկեն «Հայաքվեի» նախագծին, ասաց, որ շատ դժվար է գնալ ժողովրդի կամքին հակառակ։ Այդ պատգամավորներն աստիճանաբար սկսում են հասկանալ, որ այն ուղիով, որով իրենց տանում է Նիկոլ Փաշինյանը, ազգային աղետ է, կործանում է։ Չալաբյանը նկատում է, որ վերջիններիս մոտ էլ է գալիս այդ գիտակցումը։
«Իրենք դրանից սկսել են վախենալ, իրենք տեսել են, որ իրենց պատգամավորների ներսում արդեն սկսել է խուճապ առաջանալ։ Վերջին սոցիոլոգիական հարցումները ցույց են տալիս, որ բնակչության 70 տոկոսը եւ ավելին դեմ են գործող իշխանության կողմից իրականացվող քաղաքականությանը, բնակչության 90 տոկոսից ավելին դեմ է Արցախի հանձնմանը, եւ «Հանրաքվեն» հենց Արցախի հանձնման դեմ է, ու իրենք սկսում են հասկանալ, որ օղակն իրենց շուրջ փակվում է»,- շեշտեց Չալաբյանը։

Մեր դիտարկմանը, որ գուցե իշխանությունները հենց դրան էլ ձգտում էին, որ նախաձեռնությունը ստորագրահավաք չիրականացնի, ու կարող ենք փաստել, որ իշխանությունները հասնում են իրենց նպատակին, «Հայաքվե» նախաձեռնության համակարգողն ասաց, որ իշխանությունները չեն հասել իրենց նպատակին․ «Ես վստահ եմ, որ մենք այդ խոչընդոտները կվերացնենք»։

Նա շեշտեց, որ մեր քաղաքացիները պիտի հավասար իրավունք ստանան՝ գալու եւ ստորագրելու իրենց նախաձեռնության համար, այդ իսկ պատճառով չեն սկսի ստորագրահավաք, քանի դեռ քաղաքացիների ստորագրահավաքի մասնակցության համար հավասար պայմաններ ամենուր չեն ապահովվել։

Հարցին, թե ընդդիմության մի մաս կա, որը նույնպես դեմ է ստորագրահավաքներին, ասելով, որ հիմա գործողությունների անցնելու ժամանակն է, Չալաբյանն ասաց, որ եթե կան ընդդիմադիրներ, ովքեր ասում են, որ կան այլ կոնկրետ քայլեր, իրենք մեծ ուրախությամբ պատրաստ են այդ քայլը դիտարկել, եւ իրենց տարած գործընթացն անհրաժեշտ է, սակայն բավարար չէ իշխանափոխության հասնելու համար։ Եվ այդ գործընթացներն իրար հակադրել պետք չէ, այլ պետք է համադրել։

Հարցրինք՝ եթե իրենց քայլերը հաջողությամբ չպսակվեն, արդյոք ունե՞ն պլան Բ, Չալաբյանն ասաց․ «Պլան Բ էլ ունենք, պլան Ց էլ ունենք, համբերեք, սպասեք՝ կտեսնեք»։