Բա որ էդ 1300 ուսուցիչն էլ ատեստավորումը չանցնի, տեղը կկարողանա՞ք լրացնել. Աղազարյանը՝ Անդրեասյանին

1300 ուսուցիչները, որոնք հիմա կան, չունեն բարձրագույն կրթություն, ու ասենք թե ոչ մեկը չի անցնում ատեստավորումը, ապա միանգամից 1300 վականսիա ենք առաջացնում: Դուք ունե՞ք տարբերակներ այդ վականսիաները լրացնելու համար, թե՞ ոչ: Այս հարցադրումը հնչեցրեց ՔՊ-ական պատգամավոր Հովիկ Աղազարյանը` անդրադառնալով ՀՀ ԿԳՄՍ նախարար Ժաննա Անդրեասյանի՝ բարձրագույն կրթություն չունեցող ուսուցիչների ատեստավորման անցնելու հայտարարությանը:

Անդրեասյանն արձագանքելով` ասաց. «Արդյոք մեզ պե՞տք է ուսուցչի ֆիզիկական ներկայությունը դասարանում, թե՞ մեզ պետք է ուսուցիչ, ով կարողանում է դասավանդել այն առարկան, որը պիտի դասավանդի: Եվ եթե կամավոր ատեստավորման ժամանակ ի հայտ է գալիս, որ տվյալ առարկայի ուսուցիչը չունի տվյալ առարկայի մասին բավարար գիտելիք, ապա մենք շատ կարևոր որոշում պետք է կայացնենք՝ ընդունելու, որ այդ ուսուցիչն ամեն օր դասարան մտնելով պարզ չէ՝ օգո՞ւտ է տալիս մեր երեխաներին, թե՞ ոչ: Հետևաբար, իհարկե, այստեղ խոսքը չի գնում նրա մասին, որ այդ ուսուցիչներին թողնենք միայնակ իրենց խնդիրների հետ»:

Նրա խոսքով՝ նախորդ փուլի արդյունքում կան 700 ուսուցիչներ, որոնք հաջողությամբ չեն հաղթահարել կամավոր ատեստավորումը, ուստի պետք է այս աշնանը նույնպես պետք է պարտադիր մասնակցեն: