Կոնյակ եք գնում, միլիոններ ծախսում, ինչո՞ւ եք վարկ վերցնում.պատգամավորը՝ փոխքաղաքապետին

Երևանի փոխքաղաքապետ Կամո Արեյանն Աժ-ում ներկայացնում է Ասիական զարգացման բանկի ու ՀՀ կառավարության միջև ստորագրված վարկային համաձայնագիրը: Պատգամավոր Տիգրան Ուրիխանյանի հարցերի մեծ մասը, սակայն, քաղաքապետարանի ծախսերի ու քաղաքապետարանի աշխատանքի վերաբերյալ էին:

«Տեղյա՞կ եք, որ հիմա ձյուն է գալիս, իսկ ձյունը, երբ չի մաքրվում, խնդիրներ է առաջացնում: Հայտարարվեց, որ քաղաքապետը քաղաքում չի եղել, հետո ջղայնացել է, հանդիմանել «Սանիտեք»-ին, որ «թաղել» է քաղաքը: Կոմունալի պետի հրաժարական կամ աշխատանքից ազատում եղա՞վ: Հաջորդը՝ ո՞ւր են գնում փողերն էն պարագայում, որ կոնյակ եք գնում, արտաքին գեղագիտական լուսավորության, գործուղումների, համերգների վրա միլիոններ եք ծախսում, ինչո՞ւ եք վարկ վերցնում»,- հարցրեց ԱԺ պատգամավոր Տիգրան Ուրիխանյանը:

Կամո Արեյանն ասաց, որ հարցերը կապ չունեին քննարկվող նախագծի հետ:

«Տեղյակ ենք, որ ձյուն է գալիս, ձմեռ է, հո մեղր չի՞ կաթալու: Հաջորդը՝ որևէ մեկի հրաժարականի կարիքը չկար, քաղաքապետն էլ այդ օրերին արձակուրդում չի եղել, վերահսկել է աշխատանքը: Խորհուրդ կտամ Ձեզ՝ երիտասարդ բարեկամ, Ձեր մանդատը լիարժեք օգտագործեք այս դահլիճում, պետք չէ ինձ խորհուրդներ տալ»,-պատասխանեց Արեյանը:

Փոխքաղաքապետի պատասխանին հաջորդեց Տիգրան Ուրիխանյանի վրդովված արձագանքը. «Նախ ես Ձեզ խորհուրդ չեմ տվել, ու Դուք էլ ինձ խորհուրդ մի տվեք, պահպանեք կոռեկտություն: Ես չափավորված ու կոռեկտ էի, բարձրացնում էի երևանցիներին հուզող հարցերը, այսուհետ չփորձեք ինձ հանդիմանել»,- հավելեց պատգամավորը: