Վանաձորում և Հրազդանում մանկապարտեզների հաշվին խնայողություններ են անում

Ջերմային ցածր ռեժիմի պատճառով որոշ համայնքներում մանկապարտեզների արձակուրդները երկարաձգվել են:  Օրինակ, Վանաձորում, նախնական տվյալներով, արձակուրդները երկարաձգվել են մեկ շաբաթով, իսկ Հրազդան քաղաքում` շատ ավելի:

Խոսքը գնում է քաղաքապետարանի ենթակայության տակ գործող մանկապարտեզների մասին: Վանաձորի քաղաքապետարանն իր որոշումը հիմնավորում է վերջին շրջանում սուր շնչառական վարակների և գրիպի սեզոնային ակտիվացմամբ: Սակայն, մյուս կողմից էլ պատճառը ամենևին էլ գրիպն ու վիրուսը չէ, որ մանկապարտեզները չեն աշխատում, այլ ցածր ջերմաստիճանը:

Քաղաքապետարանն ինքն է ապահովում այդ ջերմությունը և ինքն է հոգում այդ ջերմության ծախսերը:

Այստեղ հարց է առաջանում, եթե նախադպրոցական հաստատությունները հիմնականում գազաֆիկացված են, ասել է թե, ջեռուցման հետ կապված խնդիրներ չունեն, ապա ի՞նչն է խանգարում այդ հիմնարկներում նորմալ ջեռուցում ապահովել, այնպիսի ջեռուցում, որ կհամապատասխանի սահմանված նորմին:

Ստացվում է, որ քաղաքապետարանը տնտեսում է համայնքի բյուջեն մանկապարտեզների երեխաների հաշվին: Այսինքն` ավելի լավ է երեխաներին տուն ուղարկեն, քան ջեռուցեն հիմնարկն ու հետո էլ փակեն այդ ծախսերը: Սա այն դեպքում, երբ, մասնավորապես, Վանաձորի քաղաքապետ Սամվել Դարբինյանը, մանկապարտեզների մասին խոսելիս, ամպագորգոռ հայտարարություններ է անում ու սկսում հաշվել, թե ինչքան շատ գումարներ է ծախսում մանկապարտեզների վրա: Մինչդեռ պարզվում է նույնիսկ երեխաներին  ջերմություն ապահովելու  համար չի ուզում վճարել:

Ինչ վերաբերում է Հրազդանին, ապա այս դեպքում պատկերն ավելի խղճուկ է: Մայրաքաղաքից ընդամենը 45 կլոմետր հեռավորության վրա գտնվող քաղաքի մանկապարտեզների մեծ մասը ջեռուցվում է փայտե վառարանով: Իբր քիչ է, որ քաղաքապետ Արամ Դանիելյանը մանկապարտեզների գազաֆիկացման ուղղությամբ աշխատանքեր չի տանում, դեռ ուզում է խնայողություններ անել երեխաների  հաշվին:
Ի դեպ, հարկ է նկատել, որ եթե Վանաձորի դեպքում երեխաները սովորաբար մանկապարտեզ չեն հաճախում հունվար ամսին, ապա Հրազդանի դեպքում մանկական հիմնարկները փակվում են ամիսներով: