Լիսկան ու իր որդիները մարսում են բոլոր քրեական գործերը․ ցինիզմ՝ պետական ծառայության ու հատկապես «Նիկոլ ընտրած» հասարակության նկատմամբ

Ասում են՝ անպատժելիությունը բերում է նոր հանցանք: Այդպես է դա, թե ոչ, բայց «հեղափոխությունից» հետո մի պահ կարծես շփոթմունքի մեջ հայտնված Սուրիկ Խաչատրյանի՝ Լիսկայի «դուխը» մի տեսակ նորից «տեղն է ընկել»:

Համենայնդեպս, «հարուստներից հարստությունը խլել ու աղքատներին բաժանել» խոստացող թվացյալ «Ռոբին Հուդ» Փաշինյան Նիկոլը, կարծես չտեսնելու է տալիս Խաչատրյանի ապօրինություններն ու վերջինիս որդու մասնակցությամբ տեղի ունեցող աղմկահարույց միջադեպերը: 

Խոսքը նաև օրերս Գորիսում Սուրիկ Խաչատրյանի որդու՝ Տիգրան Խաչատրյանի «սխրագործությունների» մասին է, երբ նա հայհոյել, վիրավորել, լեզվակռվի մեջ է մտել ու ծեծի ենթարկել 24-ամյա մի երիտասարդի, իսկ օրվա վերջում էլ իրեն «Տիկո» անվանելու համար կրակել վուլկանիզացիայի 46-ամյա աշխատակցի ձեռքին:

Իհարկե, ոչ հաճախակի, բայց երբեմն նման «կրակահերթային քաջագործություններից» հետո, Խաչատրյան կրտսերը կալանավորվել է, սակայն նույն հաջողությամբ էլ ազատ է արձակվել ու շարունակել, նույն լկտիությամբ, ինչպես ասում են, «աջ ու ձախ պտտացնել թուրը»:

Ու այս ամենը զուտ այն հոգեբանությամբ, որ Լիսկա մականվամբ Սուրիկ Խաչատրյանն «իշխանափոխ» է եղել:

Իհարկե, ոչ այնքան էլ վաղ անցյալում, Խաչատրյան Սուրիկը պնդում էր, թե՝

«Կարող ա բոլորը լքեն ՀՀԿ-ն, բայց ես չեմ լքելու»...

Բայց սա, եթե սուտ չէր, ուրեմն խոսքի վատնում կամ արտանետում էր, որ ծնվել էր օրվա իշխանության շուքի տակ գտնվելուց միայն: 

Այս հայտարարությունից շատ չէ՝ ընդամենը մեկ տարի անց, Փաշինյանի իշխանությունն սկսեց հետապնդել Խաչատրյանին՝ մի շարք քրեական գործեր հարուցելով նրա ու նրա ընտանիքի նկատմամբ: 

Այնպես որ, Սուրիկ Խաչատրյանը մի պահ «անհետացավ», հետո հայտնվեց, հետո էլ նրա նկատմամբ մահափորձ «բեմադրվեց» ու, ի վերջո, իր շուրջը պտտվող այս «հեղեղաջրից» նա չոր դուրս եկավ:

Իհարկե, սպանության բեմադրությունից հետո, բեմադրվեց նաև «շատ ծանր կոմային վիճակ»: Ու այն պահին, երբ շատերը մտածում էին, թե Լիսկան «կոմայից» այլևս դուրս չի գա՝ «հրաշք» տեղի ունեցավ:

Լիսկան նորից ոտքի կանգնեց, դուխ հավաքեց, իր որդի Տրդատ Խաչատրյանին «փրկեց» ծառայությունից ու սկսեց նույն գործելաոճով շարունակել իր կյանքը Գորիսում:

Իհարկե, դրանից հետո նորից եղան կալանավորումներ, ձերբակալություններ, բայց Լիսկան շատ արագ կարողանում էր «լուծել հարցերն» իշխանության հետ ու իր տղաներին ազատ արձակել: 

Մի խոսքով, շոուն՝ շոուի հետևից, բայց ոչ ինքնանպատակ:

Նիկոլ Փաշինյանը, ով մի ժամանակ Լիսկային անվանում էր «դեդավշինայի» օրենքով ապրող «կռուտոյ» պաշտոնյա, կարծես թե ընդհանուր հայտարարի է եկել նախկին մարզպետի հետ:

Այժմ էլ, ինչպես Ֆեյսբուքի իր էջում գրել է ՀՀ քննչական կոմիտեի նախագահի մամուլի քարտուղար Գոռ Աբրահամյանը, դատարանը բավարարել է Սուրիկ Խաչատրյանի որդու նկատմամբ կալանքը որպես խափանման միջոց ընտրելու վերաբերյալ միջնորդությունը: Այսինքն՝ Լիսկայի որդին կալանավորվել է, սակայն չի բացառվում, որ այդ կալանքը կարժանանա նախորդների ճակատագրին, ու նրա որդին դարձյալ կհայտնվի ազատության մեջ:

Այլ կերպ ասած՝ չի բացառվում, որ այն, որ Սուրիկ Խաչատրյանն իր որդիների հետ մարսում է բոլոր քրեական գործերը, ոչ այլ ինչ է, եթե ոչ Նիկոլ Փաշինյանի հետ գաղտնի (կուլիսային) հանցավոր պայմանավորվածությունների հետևանք:

Ու թեև ամեն անգամ Սուրիկ Խաչատրյանի և նրա մերձավորների ներգրավվածությամբ տարբեր հանցագործությունների կատարման մեջ քրեական տարրեր են եղել (հրաձգությունից մինչև սպանություն), սակայն հրապարակված փաստերին և վկայություններին, անգամ քրեաիրավական ընթացք տալուց հետո, գործերը շարունակություն չեն ունեցել, ու դրանց մասին մոռացվել է: 

Այս իրողությունը բացարձակ ցինիզմի դրսևորում է՝ պետական ծառայության ու հատկապես «Նիկոլ ընտրած» հասարակության նկատմամբ:

Արմինե Մկրտումյան