Ամեն ինչ արվում է՝ հայերի կյանքը Լեռնային Ղարաբաղում անհնար դարձնելու համար. Փաշինյան (տեսանյութ)

Հումանիտար դրությունը ԼՂ-ում շարունակում է սրվել։ Լաչինի միջանցքի ապօրինի շրջափակումը շարունակվում է։ Այդ մասին այսօր Կառավարության հերթական նիստում ասաց Նիկոլ Փաշինյանը։

Նա հիշեցրեց, որ Ադրբեջանը չի հարգում Հաագայի դատարանի որոշումը, ըստ որի՝ պետք է միջանցքը բացվի։

«Լաչինի միջանցքով չեն շարժվում ո՛չ քաղաքացիներ, ո՛չ տրանսպորտային միջոցներ, ո՛չ բեռներ։ Ավելին, արգելվել է նույնիսկ Կարմիր խաչի մեքենաների երթևեկությունը»,- ասաց նա։

Փաշինյանը նշեց, որ Հաագայի դատարանի որոշումը չկատարելը միջազգային օրակարգի հիմնահարց է։

«ԼՂ բնակչությունը զրկված է գազի ու էլեկտրաէներգիայի մատակարարումներից, դադարեցված են սննդի արտաքին մատակարարումները, դեղորայքի դեֆիցիտ է արձանագրված։ Ամեն ինչ արվում է հայերի կյանքը ԼՂ-ում անհնար դարձնելու համար։ Սա է էթնիկ զտման քաղաքականությունը»,- նշեց նա։

Փաշինյանը նշեց, որ պետք է գործարկվի Բաքու-Ստեփանակերտ երկխոսության միջազգային մեխանիզմը։

«Ինչ վերաբերում է Հայաստան-Ադրբեջան հարաբերություններին, ապա մեր դիրքորոշումը շարունակում է մնալ նույնը»,- ասաց նա։