Ո՞վ ես դու, որ իմանաս. Սուրիկ Խաչատրյանը` որդու աշխատանքից ազատվելու մասին

Սյունիքի մարզպետ Սուրիկ Խաչատրյանի (Լիսկայի) որդին` Տիգրան Խաչատրյանը ազատվել է ՀՀ Գյուղատնտեսության նախարարության «Հայանտառ» ՊՈԱԿ-ի տնօրենի օգնականի պաշտոնից: Թե ինչն էր ստիպել կրտսեր Խաչատրյանին սեփական դիմումի համաձայն ազատվել աշխատանքից, newspress.am-ը փորձեց պարզել Սուրիկ Խաչատրյանից:

«Բայց քո ինչ գործն ա, ազատվել ա, չի ազատվել… Դու ո՞վ ես, որ իմանաս էդ մասին: Ինչ եք խառնվել իրար…»,- չէր հանգստանում Սուրիկ Խաչատրյանը՝ հորդորելով անջատել հեռախոսը:

Հիշեցնեք, որ մոտ 3 ամիս առաջ, երբ Տիգրան Խաչատրյանը նշանակվեց այդ պաշտոնում, շրջանառվում էր, որ նրա աշխատանքի տեղավորման, այսպես ասած, «քավորը» եղել է վարչապետ Հովիկ Աբրահամյանը: Բայց նույն ժամանակ «Հայանտառ»-ի տնօրեն Մարտուն Մաթևոսյանն անմիջապես արձագանքեց, թե նման բան չկա և ինքն է Տիգրանին առաջարկել իր մոտ գործի անցնել, քանի որ լավ տղա է և կարող է իրեն օգտակար լինել:

Թե որքանո՞վ հաջողվեց Տիգրանից օգուտ քաղել, փորձեցինք իմանալ «Հայանտառ»-ի տնօրեն Մարտուն Մաթևոսյանից: Նրա հետ ժամեր շարունակ կապ հաստատել չէր հաջողվում: Newspress.am-ի հետ հեռախոսազրույցում տնօրենի գործավարուհին հայտնեց, որ Մաթևոսյանը տեղում է, բայց չի կարող պատասխանել, քանի որ զբաղված է և խորհուրդ տվեց զանգահարել 20 րոպե հետո: Սակայն 30 րոպե անց էլ պարզվեց, որ նա դեռ զբաղված է: Մաթևոսյանը չազատվեց գործերից նույնիսկ ժամեր հետո: Դիտարկմանը, թե գործավարուհու նշած 20 րոպեն վաղուց արդեն անցել է, վերջինս նեղսրտեց:

«Ես ի՞նչ մեղք ունեմ, որ նա դեռ չի վերջացրել, հիմա ես գնամ-ասեմ շուտ վերջացրու: Այ քեզ բան, ինչ ուզում եք արեք»,- վրդովված ասաց գործավարուհին:

Այնումենայնիվ Մաթևոսյանի հետ զրուցել մեզ հաջողվեց: Newspress.am-ի հարցմանը, թե ինչով է օգտակար եղել այս ժամանակահատվածում Տիգրան Խաչատրյանը որպես տնօրենի օգնական, Մաթևոսյանը նախ պատասխանեց, թե օրենսդրություն է ուսումնասիրել, ապա վրդովված դիմեց հարցադրմամբ. «Բայց ես չեմ` դու ես, ի՞նչ կարա անի «Հայանտառ»-ի տնօրենի օգնականը, օրինակ` ի՞նչ օգուտ կարա տա, ինչո՞վ կարա օգտակար լինի»:

Դիտարկմանը, որ ինքն էր ժամանակին հայտարարել, թե Տիգրանը լավ տղա է և կարող է օգտակար լինել` պատասխանեց. «Հա, ես էլի եմ ասում, իմ տեսակետը չեմ փոխել, բայց ժամանակը կարճ էր, նա ոչինիչ չի հասցրել անել»:

Իսկ թե ինչու է «անկատար» թողել իր աշխատանքն ու ազատվել, տնօրենը պատասխանեց. «Դե երիտասարդ տղա է, կարող ա, այլ նպատակներ ունի, հնարավոր ա ուզում ա ուրիշ տեղ աշխատի»:

Թե որտե՞ղ, Մարտուն Մաթևոսյանը չմանրամասնեց, միայն ասաց` Տիգրանին հարցրեք: Չի բացառվում նաև, որ Տիգրան Խաչատրյանին սպասում է ավելի «յուղոտ պատառ», քանի որ ՊՈԱԿ-ում նրա համար սահմանված է եղել ընդամենը 150 հազար դրամ աշխատավարձ: