Տեր-Պետրոսյանի հոդվածը Ղարաբաղի հարցում մեր խճճվածությունն ամրացնող հերթական հանգույցն է. Փաշինյան (տեսանյութ)

Ըստ ՀՀ առաջին նախագահ Լևոն Տեր-Պետրոսյանի՝ պետք էր այնպես անել, որ Ղարաբաղը մնա հայերով բնակեցված: Այս մասին  44-օրյա պատերազմի հանգամանքներն ուսումնասիրող քննիչ հանձնաժողովում հայտարարեց Նիկոլ Փաշինյանը՝ մեջբերելով առաջին նախագահի «Պատերազմ թե խաղաղություն, լրջանալու պահը» վերնագրով հոդվածն ու հավելելով, որ Տեր-Պետրոսյանը հստակ չի նշել, թե այդուհանդերձ ինչ կարգավիճակ է ունենալու Ղարաբաղը՝ Հայաստանի կամ Ադրբեջանի կազմո՞ւմ է լինելու, թե՞ անկախ:

Փաշինյանի գնահատմամբ՝ Լևոն Տեր-Պետրոսյանի Ղարաբաղի հարցում մեր խճճվածությունն ամրացնող հերթական հանգույցն էր:

Նա ընթերցեց  Տեր-Պետրոսյանի հոդվածից մի հատված, որտեղ նա գրում էր, թե՝ կարող էր չմասնակցել 1996 թվականի ընտրություններին և պատմության մեջ մնալ հաղթած նախագահ, բայց այն համարել է փոքրոգի դասալքություն, որին սովոր չէ:

Անդրադառնալով 1997 թվականին Տեր-Պետրոսյանի հրաժարականի հայտարարությանը՝ Փաշինյանը հիշեցրեց, որ հոդվածում նշվում էր Արցախի հարցին փորձագիտական մակարդակով տիրապետող 6 հոգու՝ Արկադի Ղուկասյանի, Ռոբերտ Քոչարյանի, Ալեքսանդր Արզումանյանի, Վարդան Օսկանյանի, Ժիրայր Լիպարիտյանի և իր մասին:

Նա հայտարարեց, թե փորձագիտական տեղեկատվությունը գաղտնիք չէր, քանի որ դրանք ամբողջությամբ ամրագրված էին հրապարակային փաստաթղթերում, բայց համացանց չլինելու պատճառով հասարակության լայն շրջանակները դրանցից տեղյակ չէին, բայց և անմիջապես ընդունեց, որ եղել են նաև գաղտնի փաստաթղթեր:

«Փորձագետները չէին բարձրաձայնում 1993 թվականին արցախյան կոնֆլիկտի վերաբերյալ ՄԱԿ-ի ընդունած 4 բանաձևերի մասին, որոնք արձանագրում էին Ադրբեջանի 7 շրջանների գրավումը հայկական ուժերի կողմից, ես հիմա օգտագործելու եմ այդ բանաձևերի ձևակերպումները․ պահանջում էին առանց նախապայմանների և անհապաղ զորքերի դուրս բերումն այդ տարածքներից, ԼՂՀ-ն էլ այդ բանաձևերում հիշատակված էր որպես Ադրբեջանի ռեգիոն»,- ասաց Փաշինյանը և հավելեց, որ այդ բանաձևն ուղղակի թղթի կտոր չէ: