Շիրակի մարզի դատախազը իրեն պահում է ՌԴ «ռայոնի» դատախազի աշխատակցի նման. Արթուր Սաքունց

Փետրվարի 1-ի երեկոյան Գյումրիում ռուսական թիվ 102-րդ ռազմաբազայի պայմանագրային զինծառայող, 1990 թվականին ծնված Սերգեյ Սուդնիկովը հարբած վիճակում փորձել է ներխուժել Գյումրու Անի թաղամասի բնակարաններից մեկը: Միայն ընտանիքի ճիշտ կողմնորոշման շնորհիվ Սուդնիկովին չի հաջողվել ներխուժել բնակարան:

Շիրակի մարզի դատախազ Րաֆֆի Ասլանյանը դեպքի առնչությամբ որքան էլ, որ տարօրինակ է, նշել է, որ սխալմունք է տեղի ունեցել և Սուդնիկովը պարզապես շենքն է շփոթել:

Ըստ դատախազի` նրա մեղավորությունը կորոշվի տասն օրվա ընթացքում և մինչ այդ էլ կփորձեն հասկանալ՝ միջադեպում կա՞ն հանցագործության հատկանիշներ, թե ոչ:

Իրավապաշտպան Արթուր Սաքունցը անդրադառնալով մարզի դատախազ Րաֆֆի Ասլանյանի մեկնաբանությանը, նկատեց, որ նա իրեն պահում է ՌԴ «ռայոնի» զինդատախազի աշխատակցի մակարդակի, ով ենթարկվում է ռուսական զինվորական հրամանատարության քմահաճույքներին և կամայականություններին: Պերմյակովն էլ էր շփոթել, տեսանք դա ինչով ավարտվեց:

Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը newspress.am-ի հետ զրույցում մեկնաբանելով ռուս զինծառայողի պահվածքը, նախ նշեց, որ Պրեմյակովի դատի չորրորդ նիստի ժամանակ պարզ դարձավ, որ ռուսական բազայի հրամանատարությունը բացարձակապես չի առաջնորդվում հայ-ռուսական պայամանագրով, որով սահմանվում են ռուսական բազայի ՀՀ տարածքում գտնվելու ընթացքում նրա իրավասությունները, անելիքները և հարաբերությունները ՀՀ կառույցների, պետական մարմինների և քաղաքացիների հետ:

Ռուսական բազայում, ըստ նրա, բացարձակապես տեղյակ չեն, թե ռուսական բազայի զինծառայողը, եթե որևէ հանցագործություն կատարի ռուսական բազայի տարածքից դուրս, ՀՀ քաղաքացիների նկատմամբ, ապա այդ հարցերով պետք է զբաղվեն ՀՀ իրավապահ մարմիները: Ռուսական բազայում գործում է հատուկ փնտրող խումբ՝ փախուստի դիմած կամ տարածքը լքած զինծառայողներին գտնելու համար:

Արթուր Սաքունցը շեշտեց, որ նման գործառույթ ըստ հայ-ռուսական պայմանագրի, նախատեսված չէ. նման իրավիճակներում ռազմաբազան պետք է տեղյակ պահի ՀՀ իրավապահ մարմիններին:

«Ռուսական բազայի հրամանատարությունը չի գիտակցում, որ գտնվում է այլ երկրի տարածքում, ոչ թե ՌԴ-ի որևէ զորամասում, որը կարող է դուրս գա փնտրի իր զինծառայողին, չի հասկանում, որ բազայից դուրս գործողություն իրականացնելու իրավասություն չունի»,- ասաց Ա. Սաքունցը, հավելելով, որ նման պարագայում ունեցել ենք, ունենք և կունենանք այն դրսևորումները, ինչպիսին տեղի ունեցավ նախօրեին Գյումրիում, հերթական անգամ:

Նա նաև նշեց, որ ռուսական բազայում նույն անկարգապահությունն ու անպատասխանատվությունն է, ինչ ՌԴ տարածքում, այն ինչ այլ երկրի տարածքում պետք է զինվորական կարգապահությունը ավելի բարձր լինի:

Ըստ իրավաշտպանի` եթե ռուս զինծառայողի փոխարեն հայ լիներ, ապա նրան կձերբակալեին և խափանման միջոց կկիրառվեր, որը տեղի չի ունեցել ռուս զինծառայողի պարագայում: Հայ իրավապահները անգործություն են ցուցաբերել, իսկ ռուսական բազայի կողմից ռուս-հայկական պայմանագրով նախատեսված պատշաճ վերահսկողություն չկա: