«Բերանդ մի բացի. խոսում եմ, լսի»․ Գեղամ Մանուկյանը՝ իր ելույթի ժամանակ ծիծաղող ՔՊ-ականներին (տեսանյութ)

Իրականում բյուջեի կատարողականը, ներկայացվող թվերը, տոկոսների աճը հիշեցնում է մի ալեգորիկ վիճակ՝ գեղեցիկ տուն, որի տանտերը հպարտանում է իր տան շքեղությամբ, ծաղիկներով ու գույներով, բայց տանիքը կաթում է։ Այս կերպ փորձեց իր պատկերացմամբ նկարագրել իրավիճակը «Հայաստան» խմբակցության պատգամավոր Գեղամ Մանուկյանը՝ բյուջեի կատարողականի քննարկման ժամանակ Կենտրոնական բանկի նախագահ Մարտին Գալստյանի ելույթից հետո։

Բացի այն, որ տան տանիքից կաթում է, հարևանն էլ պարբերաբար գալիս, մտնում է տուն, բռնություններ կատարում տնեցիների նկատմամբ, իսկ տանտերը չի կարողանում պաշտպանել։

Խոսելով բյուջեի ծախսերից՝ Գեղամ Մանուկյանը նշեց, որ միայն Նիկոլ Փաշինյանի անվտանգությունը մի փողոցից մյուս փողոց ապահովելու համար բազմամիլիարդանոց ծախս է արվում։ 

«ՀՀ բոլոր բնակիչներն արդեն գիտեն` եթե Սևանի ճանապարհին երկու մետրի վրա ոստիկան է կանգնած, ուրեմն շուտով ճանապարհը փակվելու է։ Երբ Նիկոլ Փաշինյանը վարչապետ ընտրվեց, մեքենայով շրջում էր բաց պատուհաններով, հիմա` ոչ, քանի որ վախենում է»,- ասաց Մանուկյանը՝ նշելով, որ փակ պատուհանները վախի հետևանք են։

Նա ընդգծեց, որ Փաշինյանը վախենում է, քանի որ երկիրն այն վիճակին է հասցրել, որ մարդիկ իրեն ամենուր ատում են։

«Նման ատելություն նախկինում երբեք չի եղել»,- ասաց Մանուկյանը։

ՔՊ-ականները սկսեցին տեղից ռեպլիկներ անել և անգամ ծիծաղել նրա այդ արտահայտության վրա։

«Բերանդ մի բացի, խոսում եմ, լսի»,- ասաց Գեղամ Մանուկյանն ու շարունակեց իր ելույթը։