Լիսկայի Տիգրանը «անտառում» էլ չդիմացավ

Հանրահայտ Լիսկայի ոչ պակաս հանրահայտ որդին՝ Տիգրան Խաչատրյանը, «անտառում» էլ չդիմացավ կամ գուցե չցանկացավ մնալ: Նա իր դիմումի համաձայն ազատվել է գյուղատնտեսության նախարարության «Հայանտառ» ՊՈԱԿ-ի տնօրենի օգնականի պաշտոնից:

Նման անսահման հնարավորություններ ունեցող երիտասարդի համար իսկապես «Հայանտառի» ՊՈԱԿ-ի տնօրենի օգնական լինելը ընդամենը եղած -չեղածի հաշիվ է: Չի բացառվում, որ այդ պաշտոնին ուղարկողները մտածել են նրանից այդկերպ նոր իմիջ ստեղծեն: Եվ բնավ զարմանալի չի լինի, եթե որոշ ժամանակ անց ՝մի քանի աղմկահարույց գործերով անցած Տիգրան Խաչատրյանը, նշանակվի ինչ-որ ՊՈԱԿ-ի տնօրեն: Եթե Սուրիկ Խաչատրյանի օգնական Զարզանդ Նիկողոսյանը կարող է նշանակվել դպրոցի տնօրենի տեղակալ, ապա Լիսկայի որդին ինչո՞վ է պակաս Զարզանդից: Բայց ուշագրավն այստեղ այն է, որ «Հայանտառի» ՊՈԱԿ-ի տնօրենի օգնական նշանակելուց հետո, նույն ՊՈԱԿ-ի տնօրեն Մարտուն Մաթեւոսյանը ի լուր աշխարհին, գլուխը բարձր հայտարարեց.«Ես եմ առաջարկել… նաև իմանալով Տիգրանի կարողությունները: Տիգրանը բավականին պատրաստված երիտասարդ է»:

Հետաքրքիր է իմանալ, թե այս մի քանի ամիսների ընթացքում իր պատրաստվածությամբ ինչպես դրսևորվեց Տիգրանն «անտառում»՝ վայրի բնության կենդանիները սատկեցին, շատացան, ապօրինի ծառահատումները նվազեցին, թե՞ հակառակը: «Հայանտառի» ՊՈԱԿ-ի տնօրենը պարտավոր է այս հարցերի պատասխանը տալ, քանի որ նա է Տիգրանին հրավիրել աշխատանքի, ով մի քանի ամիս շարունակ աշխատավարձ է ստացել հարկատուների հաշվին: Ով իմանա, գուցե այդ պարզաբանումից հետո պատմափիլիսոփայական գիտությունների դոկտորի որդու կարողությունները այլ ընկերություններ ևս գնահատեն՝ աշխատանքի հրավերի առաջարկության տեսքով:

Իսկ եթե լուրջ, այս ամենն իսկական մառազմ է կամ տրագիկոմեդիա. ծայրահղությունից ծայրահեղության մեջ լողացող այս երիտասարդն իսկապես կողմնորոշման կարիք ունի: Կողմնորոշման կարիք ունի նաև հանրությունը, ում համար անհասկանալի է, թե Լիսկայի որդին ի վերջո հարց լուծող ժառանգորդ է, թե մեղքերին քավություն տված փողկապով պաշտոնյա: