Էրդողանն առանձնահատուկ բարևել է վարչապետին. նրա այցը գլխավոր իրադարձություններից մեկն է եղել և գտնվել ուշադրության կենտրոնում. Ալեն Սիմոնյան (տեսանյութ)

ԱԺ նախագահ Ալեն Սիմոնյանը սխալ է համարում «Նեմեսիս»-ի հուշարձանի տեղադրումը: Նա այդ մասին հայտարարեց այն ժամանակ, երբ լրագրողները հետաքրքրվեցին, թե արդյոք Փաշինյանի այցը Թուրքիա հաղթահարե՞ց «Նեմեսիս»-ի հուշարձանի հետ կապված իրավիճակը:

«Թուրքական կողմը, ցանկություն ունենալու պարագայում, կարող է անընդհատ պատճառներ բերել, կարող է «Նեմեսիս»-ի արձանը չլինի, ուրիշ բան լինի, ես՝ ինքս, «Նեմեսիս»-ի արձանի տեղադրումը սխալ եմ համարում, որովհետև դա պետական քաղաքականության գիծ չէ ու չի կարող լինել»,- ասաց նա:

Սիմոնյանի համոզմամբ՝ այդ արձանի տեղադրումն ընդամենն առիթ էր Թուրքիայի համար՝ պատճառներ գտնելու:

«Ես հայտարարել եմ՝ Թուրքիա չգնալու համար կարող էի 1 միլիոն պատճառ գտնել ու չգնալ, եթե Թուրքիայի կողմից կամքը կա, իսկ ես տպավորություն ունեմ, որ կա, ապա հարաբերությունները կարգավորելու պատմական ու եզակի հնարավորություն կա, մենք դրան պատրաստ ենք, պատրաստ ենք նույնիսկ անցնել մեծ քննադատությունների միջով, բայց երկարատև խաղաղություն բերել հայ ժողովրդին»,- ընդգծեց Սիմոնյանը:

Նա վստահեցրեց նաև, թե Փաշինյանի այցը Թուրքիա բավականին լավ է անցել:

«Շատերը նեղսրտել են, որ Էրդողանն առաջին շարքին բարևելուց հետո, առանձնահատուկ բարևել է վարչապետին: Նա եղել է ուշադրության կենտրոնում: Այցը, կարելի է ասել, գլխավոր իրադարձություններց մեկն է եղել», - ասաց Ալեն Սիմոնյանը: