Սովի, ռազմական գործողությունների ժամանակ վառելիք չտրամադրողը քրեական պատասխանատվության կենթարկվի՞․ Արծվիկ Մինասյանը՝ ՆԳ նախարարի տեղակալին

Գաղտնիք չէ, որ ռազմավարական պաշարների, հատկապես, կրիտիկական ծավալների ապահովումն անվտանգության առաջնային խնդիր է։ Այս մասին այսօր ԱԺ հերթական քառօրյայի ժամանակ ասաց «Հայաստան» խմբակցության քարտուղար Արծվիկ Մինասյանը:

Միևնույն ժամանակ, նա նշեց, որ եթե անգամ վարչական պատասխանատվության ենթարկվի որևէ կազմակերպություն, անհատ, ԱՁ կամ նույնիսկ որևէ պետական պաշտոնյա, սրանով չի բարելավվի այն իրավիճակը, որ կարող է առաջանալ ռիսկային պայմաններում։

«Կրիտիկական հաշվետվությունները հրապարակման ենթակա չեն, բայց շատ կարևոր է, որ ժամանակին լինեն: Արդյոք քննարկվե՞լ են այն հարցերը, որ կենսական նշանակության, սովամահության կամ ռազմական գործողությունների շրջանակում անհրաժեշտ վառելիք եթե մեկը չապահովի, ապա քրեական պատասխանատվության ենթարկվի»,-հետաքրքրվեց Մինասյանը։

Ներքին գործերի նախարարի տեղակալ Դավիթ Համբարյանը պատասխանեց, որ դաշտը կարող են վերահսկել՝ վարչական պատասխանատվության ենթարկելով։

Հիշեցնենք, որ ԱԺ-ում քննարկվում է «Վարչական իրավախախտումների վերաբերյալ ՀՀ օրենսգրքում լրացումներ և փոփոխություններ կատարելու մասին» և «Նյութական պահուստի մասին» օրենքում լրացումներ կատարելու մասին» նախագծերի փաթեթը։

Ըստ այդմ՝ կազմակերպությունների կողմից լիազոր մարմնին սահմանված ժամկետներում և կարգով ռազմավարական պաշարների պահուստի անվանացանկում ներառված ապրանքների վերաբերյալ հաշվետվություն չներկայացնելու դեպքում նախատեսվել է վարչական պատասխանատվություն: