Մետրո պիտի կառուցենք, մի ամիս է՝ փոս չենք կարում լցնենք, գնացեք անձամբ արեք. Ավինյանը՝ վարչության պետին (տեսանյութ)

Արդեն որերորդ շաբաթն է` այս փոսերի մասին խոսում եմ, հարգելի գործընկերներ՝ երրո՞րդ, չորրո՞րդ: Այս հարցն ուղղեց փոխքաղաքապետ Տիգրան Ավինյանը՝ գործավարական նիստի ժամանակ, երբ Շինարարության և բարեկարգման վարչության պետի պաշտոնակատար Խորեն Գրիգորյանը, անդրադառնալով փոսալցման աշխատանքներին, հայտարարեց, որ Էրեբունի-Նուբարաշեն չափաբաժնի և Նուբարաշեն Աջափնյակ չափաբաժնի կապալառու կազմակերպության հետ պայմանագրի խզման են գնացել և հրատապ կկազմակերպեն նոր մրցույթը:

Ավինյանն էլ արձագանքեց, թե՝ հրատապը ոչ թե մրցույթն է, այլ այն, որ գնումները մեկ անձից են: Նա նաև նշեց, որ նախորդ շաբաթ նիստից հետո նաև փակ քննարկում են ունեցել վարչական շրջանների ղեկավարների ու Գրիգորյանի հետ, և դեռ այդ փոսերի մասին քննարկումներն ակտուալ են:

«Փոսեր, փոսեր, փոսեր... ուզում եմ հասկանալ մինչև ո՞ր ամիսն է ձգվելու: Վարչական շրջանների ղեկավարներ, երկրորդային փողոցների փոսալցման աշխատանքներն էլ ձեր պատասխանատվությունն է, ուզում եմ ձեզ հիշեցնել. ի՞նչ չունեք՝ ֆինանս չունե՞ք, ո՞րն է խնդիրը, ո՞վ կարող է պատասխանել այս հարցին: Մետրո պիտի կառուցենք Աջափնյակում, մի ամիս է` փոս չենք կարում լցնենք քաղաքում, հետո էլ կասեք՝ էս մեկը գնաց նկարեց, սենց արեց: Մենք մեր ամենապրիմիտիվ աշխատանքը չենք կարող կատարել:

Սա վերջին շաբաթն է՝ հրատապով կլինի, մեկ անձից կլինի, ուզում եք գնացեք անձամբ լցրեք, բայց եթե հաջորդ երկուշաբթի ևս մեկ դեպք արձանագրվեց, ինձանից չնեղանաք»,- ասաց Ավինյանը: