Պուտինը Կրեմլում երեք դավադրություն է կանխել․ Проект

Ռուսաստանի նախագահ Վլադիմիր Պուտինը Կրեմլում գտնվելու տարիներին կանխել է երեք դավադրություն և իր հավանական մրցակիցներին հեռացրել ղեկավար պաշտոններից։

Այս մասին հայտնում է ընդդիմադիր ռուսական «Проект» հրատարակությունը։ Թեև չկա որևէ ապացույց, որ այդ ամենը իրականում եղել է, սակայն Պուտինը դրանք ընկալել է որպես դավադրություն, նշում է թերթը։

Առաջին մարդը, ում, ըստ հրապարակման, Պուտինը հեռացրել է զբաղեցրած պաշտոնից՝ դավադրության կասկածանքների պատճառով, Միխայիլ Կասյանովն է։ Այն բանից հետո, երբ Կասյանովը հանդես եկավ ի պաշտպանություն Միխայիլ Խոդորկովսկու, նա ողջ կաբինետի հետ միասին հեռացվեց վարչապետի պաշտոնից։ Հրաժարականի իրական պատճառը կարող է լինել Պուտինի կասկածը, որ նա կարող է փորձել զբաղեցնել իր տեղը։ 

Ըստ հետաքննության նույնը պատահել է Միխայիլ Ֆրադկովի հետ, որին Պուտինը 2008-ի նախագահական ընտրություններից առաջ հեռացրեց կառավարության ղեկավարի պաշտոնից՝ նշանակելով արտաքին հետախուզության ծառայության ղեկավար։ Ըստ հրապարակման՝ դա տեղի է ունեցել այն բանից հետո, երբ Պուտինը իմացել է Ֆրադկովի, Մոսկվայի քաղաքապետ Յուրի Լուժկովի, գլխավոր դատախազ Վլադիմիր Ուստինովի և նախագահի աշխատակազմի ղեկավարի տեղակալ Իգոր Սեչինի միջև իշխանության գալու գաղտնի քննարկման մասին։ Դրանից հետո Ուստինովը նույնպես տեղափոխվել է այլ պաշտոնի՝ նշանակվելով ՌԴ արդարադատության նախարար։

Հրատարակությունը որպես դավադրության վերջին դեպքը  համարում  Դմիտրի Մեդվեդևի գործունեությունը որպես  պետության ղեկավար։ Ինչ-որ պահի, ինչպես նշում են հրապարակման հեղինակները, նա սկսել է ինքնուրույն որոշումներ կայացնել, ինչը դուր չի եկել Պուտինին։ 2011 թվականի ամռան վերջին Պուտինը Մեդվեդևին ասել է, որ վերադառնում է նախագահի պաշտոնին, բայց խոստացել է վեց տարի հետո կրկին փոխել պաշտոնները։