Անդրանիկ Թևանյանը ցանկանում է քաղաքապետի թեկնածու լինել. ում հետ է բանակցում. «Ժողովուրդ»

«Ժողովուրդ» օրաթերթը գրում է.

«Երևանում աշնանը սպասվում են ավագանու ընտրություններ. մինչ հայաստանյան քաղաքական դաշտն ակտիվորեն պատրաստվում է ընտրությունների, իսկ իշխող քաղաքական ուժի թեկնածու Տիգրան Ավինյանն արդեն իսկ սկսել է քարոզարշավը, խորհրդարանական ընդդիմությունը լռում է:

«Ժողովուրդ» օրաթերթը տեղեկացավ, որ խորհրդարանական ընդդիմությունը հիմնականում դեմ է ընտրություններին մասնակցելուն, բայց հայտարարում են, թե դեռ որոշում չունեն՝ մասնակցելու են ընտրություններին, թե ոչ:

Փոխարենը «Հայաստան» խմբակցությունից Անդրանիկ Թևանյանը մեծ ցանկություն ունի առաջադրվելու՝ որպես ընդդիմության միասնական թեկնածու: Այս օրերին նա ակտիվորեն հանդիպում է արտախորհրդարանական ուժերի հետ, բանակցում խմբակցության իր թիմակիցների հետ, որպեսզի սատարեն իրեն:

«Ժողովուրդ» օրաթերթը այս առիթով մեկնաբանություն է վերցրել նաև Թևանյանից՝ հասկանալու՝ վերջնական ինչ որոշում ունի ընտրություններին մասնակցելու մասով. «Մենք նախաձեռնել ենք «Մայր Հայաստան» շարժումը, բայց շարժման օրակարգում Երևանի ավագանու ընտրություններին մասնակցելու հարց չենք քննարկել. երբ ժամանակը գա, կորոշենք՝ մասնակցում ենք, թե ոչ: Մասնակցությունը բացառապես քաղաքական կարող է լինել։ Կարծում եմ՝ այս պահին վաղաժամ է խոսել ընտրություններին մասնակցելու մասին, քանի որ երկրի առջև բազմաթիվ անվտանգային խնդիրներ կան ծառացած»,- ասաց նա:

Պատգամավորից հետաքրքրվեցինք՝ այս օրերին հանդիպումներ ունենում է արդյոք քաղաքական ուժերի հետ, թիմակիցների հետ քննարկել է արդյոք ավագանու ընտրություններին մասնակցելու հարցը.

«Մենք հանդիպում ենք բացառապես «Մայր Հայաստան» շարժման շրջանակներում՝ մեր հռչակած նպատակների շուրջ գործողութունների գնալու, համախմբելու և կազմակերպչական հարցեր քննարկելու համար: Ընտրություններին մասնակցելու հարց դեռ չենք քննարկել. հազար ու մի անվտանգային հարց կա»,-ասաց նա»:

Ամբողջությամբ հոդվածը՝ «Ժողովուրդ» օրաթերթի այսօրվա համարում: