Էս երկրում կարելի է շանտաժով զանգել, ասել` դիմում կգրես. Նիկոլ Փաշինյան

ՀՀ Մարդու իրավունքների 3-րդ պաշտպան Կարեն Անդրեասյանի՝ անհասկանալի հանգամանքներում ներկայացրած հրաժարականը շարունակում է քննարկման առարկա լինել: Դեռ չմարած կրքերը այսօր վերստին բորբոքվեցին՝ այս անգամ Ազգային ժողովի լիագումար նիստում:

ԱԺ-ում հարցը քննարկվում էր ուրբաթ օրը պետաիրավական հարցերի մշտական հանձնաժողովում կայացած որոշման համատեքստում: Ըստ այդ որոշման՝ ՄԻՊ թեկնածու պետք է առաջադրի հենց պետաիրավական հարցերի հանձնաժողովը:

ՀՀԿ պատգամավոր Հովհաննես Սահակյանը ՄԻՊ հրաժարականը անվանեց աննախադեպ իրավիճակ՝ նկատելով, որ մեկ ամսում պետք է անցկացվի նոր ընտրություն:

Սահակյանին հակադարձելով՝ ԱԺ պատգամավոր Նիկոլ Փաշինյանը հիշեցրեց, որ 2-րդ պաշտպանը նույնպես հրաժարական է տվել, եւ առաջին պաշտպանի գործունեությունն էլ ավարտվել է որոշակի սկանդալային ֆոնով:

Այնուհետեւ, Փաշինյանը հարց բարձրացրեց. ինչո՞ւ չպետք է ՄԻՊ թեկնածուին առաջադրի ԱԺ մարդու իրավունքների հանձնաժողովը:

«Էդ նույնն է, որ Տնտեսական մրցակցության պաշտպանության պետական հանձնաժողովի նախագահի թեկնածու առաջադրելու հնարավորություն ունենա Ազգային ժողովը, եւ ասեն՝ Կրթության եւ գիտության հանձնաժողովն է առաջադրում թեկնածուին»,- ասաց Փաշինյանը:

Նա փորձեց պարզել նաեւ, թե արդյո՞ք Սահակյանը, կամ նրա գլխավորած պետաիրավական հարցերի հանձնաժողովը փորձել է պարզել Կարեն Անդրեասյանի հրաժարականի պատճառը:

«Քանի որ 3 օմբուդսմենների հետ կապված խնդիր ունենք, դուք, ինչպես պնդում եք, մարդու իրավունքների պաշտպանի ինստիտուտով մտահոգված հանձնաժողով, ընդհանրապես հետաքրքրվե՞լ եք. լավ, ի՞նչ տեղի ունեցավ էս Մարդու իրավունքների պաշտպանի հետ: Որովհետեւ այնտեղ խոսակցություններ են գնում, որ ինչ-որ հարկադրանքներ են կիրառվել, ստիպել են մարդուն, խոսակցություններ կան շանտաժի մասին, եւ այդ ամենը կապվում է կոնկրետ մարդու անվան հետ: Խոսքը Վատիկանում ՀՀ դեսպան Միքայել Մինասյանի մասին է: Հիմա եթե Ազգային ժողովը՝ երկրի բարձրադիր օրենսդրական մարմինը, կարող է մի պաշտոնյա նշանակել, եւ հաջորդ պահին որեւէ երկրում դեսպան զանգի ասի՝ շուտ-շուտ հրաժարական տուր …Մենք չպիտի՞ էս ինստիտուտների աշխատանքը հասկանանք, ի վերջո: Էս ի՞նչ է կատարվում: Եվ որպես պետաիրավական հարցերի հանձնաժողովի նախագահ՝ խնդրում եմ ասեք. եթե հանկարծ պարզվի, որ այդ լուրերը իրականությանը համապատասխանում են՝ այստեղ քրեական հանցակազմ չկա՞: Ի վերջո մարդու իրավունքների պաշտպանը անձեռնմխելի, օրենքով սահմանված ինստիտուտի ղեկավար է. ի՞նչ է նշանակում նրան հարկադրել, որպեսզի նա հրաժարական տա բեմի հետեւում, ինչ-որ կուլիսներում: Էստեղ հանցակազմ չկա՞ եւ չե՞ք կարծում, որ իրավապահ մարմինները պետք է քննեն գործը: Մարդու իրավունքների պաշտպանին զանգել, սպառնալ, ասել առավոտ դիմո՞ւմ կգրես»,- հետաքրքրվեց Փաշինյանը:

ԱԺ-ում ընդմիջում հայտարարվեց: