Ոստիկանության կրթահամալիրի և Ճգնաժամային կառավարման պետական ակադեմիայի միավորման արդյունքում կձևավորվի ՆԳՆ կրթահամալիր

Կայացել է ՀՀ ՆԳՆ կրթահամալիրի ձևավորման հարցերով աշխատանքային խմբի նիստը՝ ՆԳ նախարարի տեղակալ Արփինե Սարգսյանի համակարգմամբ։

Ինչպես տեղեկացրին ՀՀ ներքին գործերի նախարարության ոստիկանությունից, նիստի շրջանակներում փոխնախարար Սարգսյանը նշել է, որ Ներքին գործերի նախարարությունում մշակվել է ՆԳՆ կրթահամալիրի ձևավորման հայեցակարգի առաջին տարբերակը, որը պետք է աշխատանքային խմբի կողմից վերջնականացվի և հավակնի դառնալու օրենսդրական նախաձեռնության հիմքը։

«Սարգսյանը կարևորել է այն, որ Ոստիկանության կրթահամալիրի և Ճգնաժամային կառավարման պետական ակադեմիայի միավորման արդյունքում ձևավորվող նոր կրթահամալիրը կենտրոնանալու է բացառապես հանրությանն արդյունավետ ծառայություն մատուցող, պրոֆեսիոնալ, բարեվարք ծառայող պատրաստելու և վերապատրաստելու վրա։

Նա ընդգծել է, որ որքան էլ անվիճելի է կրթահամալիրում ուսումնառություն ստացած և, օրինակ, իրավաբանի որակավորում ունեցող կադրերի բարձր որակը, այդուհանդերձ պետք է հստակ լինի, որ նոր ձևավորվող, պրոֆիլային կրթահամալիրը պարզապես իրավաբան կամ տնտեսագետ պատրաստող կառույց չի կարող լինել, և պետք է միտված լինի բացառապես ՆԳՆ ենթակայության տակ գտնվող ծառայությունների կադրային պահանջարկը բավարարելուն։ Հետևապես, լուծումները հենվում են հենց այդ տրամաբանության վրա»,- ասվում է հաղորդագրության մեջ։

Ըստ աղբյուրի՝ փոխնախարար Սարգսյանը նշել է, որ հարցի առնչությամբ քննարկումներ են տեղի ունեցել նաև Կրթության, գիտության, մշակույթի և սպորտի նախարարության գործընկերների հետ՝ հայեցակարգային լուծումները կրթության ոլորտի ընդհանուր քաղաքականությանը համահունչ առաջ տանելու նպատակով։

Հայեցակարգի առաջին տարբերակի շրջանակներում առանձին բաժիններով անդրադարձ է կատարվել նաև՝
– ՆԳՆ կրթահամալիրի կադրային քաղաքականությանը,
– ՆԳՆ կրթահամալիրի կառուցվածքին,
– ՆԳՆ կրթահամալիրի կողմից կրթության գործընթացի կազմակերպմանը,
– Ոստիկան, փրկարար կամ ճգնաժամային կառավարման ոլորտի համար բազային կուրսի ներդրմանը,
– ՆԳՆ կրթահամալիրի շենքային պայմաններին՝ կրթական բարենպաստ միջավայր ձևավորելու նպատակով:

Նշվում է, որ աշխատանքային խումբը քննարկել է նաև կարճաժամկետ, միջնաժամկետ և երկարաժամկետ պլանում ՆԳՆ կրթահամալիրի ձևավորմանը միտված քայլերի հաջորդականությունը։

Պայմանավորվածություն է ձեռք բերվել մինչև հուլիսի երկրորդ տասնօրյակը վերջնականացնել ՆԳՆ կրթահամալիրի ձևավորման հայեցակարգը, ապա ձեռնամուխ լինել օրենսդրական փաթեթի մշակման աշխատանքներին։