«Աշոտիկ շոուն» նախաձեռնված էր զոհվածների ծնողներին վարկաբեկելու համար. Փոստանջյան

Թե ինչու էր «հատուկ պահպանության օբյեկտ» հանդիսացող Աշոտ Փաշինյանը հայտնվել առանց անվտանգության աշխատակիցների՝ հարց է: Այս մասին ասուլիսի ժամանակ ասաց ԱԺ նախկին պատգամավոր Զարուհի Փոստանջյանը, ով համոզված է՝ «Աշոտիկ շոուն» նախաձեռնված էր զոհվածների ծնողներին վարկաբեկելու համար:

Զարուհի Փոստանջյանը նկատում է, որ ի սկզբանե ծնողները հայտարարել էին, որ իրենց պայքարը քաղաքական է, իսկ հետո ասացին, որ ոչ թե քաղաքական, այլ բարոյական տիրույթում է։

«Պետք չէ մտածել, որ քաղաքականությունն անբարոյական տիրույթում է, եթե տեսել ենք, որ եղել է նաև անբարոյական քաղաքականություն, դա չի նշանակում, որ քաղաքականությունն անբարոյական պահանջների ներքո է։ Ի վերջո, սա քաղաքական հետապնդում է, և նա կալանավորման մեջ է քաղաքական հայացքների համար, որովհետև «հանդգնել է» խոսել Աշոտիկի հետ»,- ընդգծում է Փոստանջյանը։

Նա նկատում է նաև, որ զոհվածների ծնողները պետք է նաև հաշվի առնեն, որ իրենց որդիները պատերազմի դաշտում եղել են քաղաքական որոշման արդյունքում ու կռվել են քաղաքական գործընթացի արդյունքում։

«Դա իրենց գործն է, թե ինչու իրենք որոշեցին քաղաքական պայքարը փոխարինել բարոյական պայքարով, բայց եթե նրանք շփվել են Աշոտիկի հետ, արդեն իսկ ամեն ինչ քաղաքականացվում է»,- ասում է Զարուհի Փոստանջյանը։

Նա նաև նկատում է, որ Աշոտի հայտնվելը աշխատանքային ժամին դատարանի բակում՝ պլանավորած ծրագրի մասին էր։