Անձնական-քաղաքական հաշվեհարդա՞ր են տեսել, վախեցնո՞ւմ են, թե՞ գաղտնալսող սարք են թողել. դիմում ԱԱԾ տնօրենին, ՆԳ նախարարին և ՔԿ նախագահին

ՀՀ Ազգային անվտանգության ծառայության տնօրեն Արմեն Աբազյանին,
ՀՀ Ներքին գործերի նախարար Վահե Ղազարյանին,
ՀՀ Քննչական կոմիտեի նախագահ Արգիշտի Քյարամյանին
NEWSPRESS.am լրատվական կայքի
հիմնադիր-տնօրեն Արմենուհի (Արիանա) Հովսեփյանի կողմից

Սույն թվականի հունիսի 6-ին՝ ժամը 10:30-ի սահմաններում, դուրս եմ եկել Թումանյան փողոցում գտնվող իմ բնակության հասցեից, վերադարձել եմ ժամը 15:00-ի սահմաններում: Վերադառնալով, փորձել եմ բանալիով բացել բնակարանի դուռը, սակայն նկատել եմ, որ այն արդեն բաց է: Իմ ննջասենյակում հայտնաբերել եմ ամբողջովին տակնուվրա արված զգեստներս: Որևէ թանկարժեք իր, սակայն, տանից չի պակասել:

Անմիջապես ահազանգել եմ ոստիկանություն: Օպերատիվորեն ժամանել են Ոստիկանության և Քննչական կոմիտեի մեծ թվով աշխատակիցներ, տեղում իրականացրել մասնագիտական աշխատանքներ, ինչի համար հայտնում եմ իմ շնորհակալությունը: 

Սակայն, միայն տեղում իրականացված աշխատանքը բավարար չէ այնքանով, քանի դեռ հայտնաբերված ու պատժված չեն այս՝ նախօրոք պլանավորված հանցագործության կազմակերպիչները և/կամ կատարողները: 

Քանի որ շարքային գողության համար իմ բնակության հասցե ներխուժած անձը կամ անձինք որևէ բան չեն տարել, ես կարող եմ ինձ թույլ տալ ենթադրել, որ չարագործների նպատակն ամենևին էլ գողություն կատարելը չի եղել, այլ, ասենք, ինձ վախեցնելը կամ հաշվեհարդար տեսնելը: 

Եթե այս հանցագործությունն էլ դասվի նախկինում իմ դեմ ուղղված և չբացահայտված հանցագործությունների շարքին, ապա ես իրավունք կունենամ ենթադրելու, որ իրավապահ մարմիններն իրենց «փոքրիկ» շահը կամ ներդրումն ունեն այս գործում: 

Ինձ նաև «շշուկներ» են հասնում, թե իրականացվածը կարող է կապ ունենալ Դոգ մականունով հայտնի՝ Վարդան Ղուկասյանի անվան հետ, քանի որ վերջինս իր ուղիղ եթերների ընթացքում մի քանի անգամ զանգահարել է ինձ: Բացի այդ, YouTube-ում գործում է իմ անվամբ ալիք, որը տեղադրում է միաժամանակ և՛ իմ, և՛ Վարդան Ղուկասյանի ելույթները: Հավաստիացնում եմ, որ որևէ առնչություն չունեմ ո՛չ այդ ալիքի, ո՛չ էլ այն շահագործողների հետ: Դա ձեզ համար շատ հեշտ է պարզելն ու նույնիսկ արգելափակելը:  

Եթե կատարվածը քաղաքական հետապնդում է, ապա հրապարակային կերպով քանիցս քննադատել եմ ընդդիմության առաջնորդ Ռոբերտ Քոչարյանին, ՔՊ-ական հայտնի հայրենադավ Գագիկ Մելքոնյանին և որոշ քրեական հեղինակությունների, որոնց անունները ևս պատրաստ եմ հրապարակել հաջորդիվ, ըստ անհրաժեշտության: 

Որպես ակտիվ հասարակական գործիչ, առավել ևս, որպես լրատվական կայքի հիմնադիր-տնօրեն, հարգելի պարոնայք, պահանջում եմ ապահովել իմ անվտանգությունը, կյանքի, ազատ տեղաշարժի և խոսքի ազատության իրավունքները: 

Հարգելի պարոնայք, 

իմ տունը, իմ ննջասենյակը տակնուվրա անելու պատմությունը կասկածելի է այնքանով, որ դեպքը տեղի չի ունեցել այն ժամանակ, երբ ես բացակայել եմ երկրից կամ տուն չեն մտել այն ժամանակ, երբ ես տանն եմ: Ենթադրում եմ, որ հետևել են ինձ, և տուն մտել օրը ցերեկով՝ վստահ լինելով, որ ես տանը չեմ: 

Իսկ գուցե ինչ-որ ավելի արժեքավոր բա՞ն են փնտրել կամ ընդհակառակը՝ բերել թողել... Դե, ասենք, գաղտնալսող կամ տեսագրող սարք... Այս ամենը ստուգելը ևս ձեր պարտքն է:  

Ես չեմ ուզում հավատալ, որ Հայաստանում իրավապահ համակարգը կամ թույլ է այնքան, որ մի սովորական բնակարանագողի չի կարողանում բռնել (եթե իհարկե, նա սովորական գող էր) կամ ինքը հանցակից կամ գործիք է դառնում ինչ-որ մարդկանց ձեռքում: 

Սպասում եմ ձեր օպերատիվ արձագանքին: