Նիկոլ Փաշինյանի թրի տակով անցած Վահագն Գևորգյանը նախկին սուպերմարկետի տարածքում օնլայն կազինո է աշխատեցնում (լուսանկար)

Կոտայքի մարզի Աբովյան քաղաքում ժամանակին գործում էր սուպերմարկետ՝ հենց «Աբովյան» անվանումով: Սուպերմարկետի ֆեյսբուքյան էջից պարզ է դառնում, որ այն դադարել է գործելուց մոտավորապես 2020 թվականի տարեվերջից:

Նախկին սուպերմարկետը գտնվում է Աբովյան բժշկական կենտրոնի հարևանությամբ՝ Հատիսի 1/80 հասցեում: Այն պատկանում էր ԲՀԿ առաջնորդ Գագիկ Ծառուկյանի փեսա Կարապետ Գուլոյանին: 

Սուպերմարկետի փակումն ինքնին ուշադրության արժանի փաստ չէր լինի, եթե այն պարզապես դադարեր գործելուց կամ էլ մեկ այլ նշանակության ծառայեր: Բայց մեր աղբյուրի ուշադրությունից չի վրիպել այն, որ սուպերմարկետի փակվելուց հետո, փակվել են նաև պատուհանները:

NEWSPRESS.am-ի տեղեկություններով՝ սուպերմարկետի տարածքն այժմ փաստացի տնօրինում ու օգտագործում է Աբովյանի նախկին քաղաքապետ Վահագն Գևորգյանը, ով 2021 թվականի դեկտեմբերի 17-ին Նիկոլ Փաշինյանի որոշմամբ՝ նշանակվել է Ջրային կոմիտեի ղեկավար: Դա հենց այն օրն էր, երբ հայտնի դարձավ, որ Աբովյանի քաղաքապետ է ընտրվել Էդուարդ Բաբայանը: 

Մեր տեղեկություններով՝ այժմ այդ հասցեում օնլայն կազինո է գործում, որը պատկանում է նույն Վահագն Գևորգյանին, ով, իհարկե, նման «արտոնություն» չէր ստանա, եթե չանցներ Նիկոլ Փաշինյանի սրի տակով: 

Նշված տարածքում հաճախ են հանդիպում համապատասխան վերնաշապիկներով դիլլերներ, ովքեր դուրս ու ներս են անում: Այդտեղ նաև անվտանգություն է աշխատում: 

Հարց է առաջանում միայն, թե պետական պաշտոն զբաղեցնող անձն ինչո՞վ է ավելի հետաքրքրված՝ Ջրային կոմիտեի՞ խնդիրներով, թե՞ օնլայն կազինո աշխատեցնելով ու, ըստ էության, գումար վաստակելով: