Նոր Նորքի ատամնաբույժ թաղապետը նորքեցիների ատամներն է հաշվում

Նոր Նորք վարչական տարածքի ղեկավար` մասնագիտությամբ ատամնաբույժ Արմեն Ուլիխանյանը սկսել է հաշվել իր թաղամասի բնակիչների ատամները:

Չգիտես, թե ինչու պաշտոնավարումից միայն 4 տարի հետո, նա որոշել է բնակիչներից գանձել 2012 թվականի աղբահանության դիմաց չվճարված գումարները:

newspress.am-ին ահազանգող բնակիչները թաղապետի նման գործելաոճը որակեցին որպես «ռեկետ»:

Նախ պետք է նկատել, որ աղբահանության վճարողների հաշվառումն իրականացվում է վճարողների գրանցման մատյանում: Սակայն, թաղապետարանը չունի գրանցամատյան: Վարձավճարները գանձելու համար թաղապետարանը օգտվում է համակարգչային ցուցակներից ու բնակիչներից պահանջում 2012 թվականի կատարած մուծումների կտրոնները:

Բնակիչների պնդումներին` ներկայացնել գրանցամատյանները և հետո միայն գանձել վարձավճարները, արդյունք չի տվել, հակառակը, ըստ բնակիչների, թաղապետարանից սպառնացել են. «կամ վճարեք, կամ կհայտնվեք դատարանում»:

Սա թաղապետարանի կողմից եզակի «ռեկետ»-ը չէ: Նախատոնական օրերին էլ newspress.am-ին էին զանգահարել Նոր Նորքի նախկին շուկայի հարակից տարածքում առևտուր իրականացնող գյուղացիները` դժգոհելով, որ թաղապետարանից ամեն օր մարդիկ են գալիս ու անհիմն գումար պահանջում իրենցից:

Պաշտոնավարման տարիներին Արմեն Ուլիխանյանը միշտ էլ աչքի է ընկել իր անձը գերագնահատելու հատուկ շնորհքով: Նոր Նորքի թաղապետն էր, որ հայտնվեց մամուլի կիզակետում` սեփական լուսանկարի դիմաց 8000 դոլլար վճարելու համար:

Նրա նկարն էր, որ Նոր Նորքի բարձունքի գովազդային վահանակից չէր իջնում: Նույիսկ նորքեցինեը անեկդոտի նման ասում էին. «Թաղապետը երկինք է բարձրացել ու չի ուզում իջնի»:

Փաստորեն երկնքից իջնելուց հետո` Արեմն Ուլիխանյանը անցել է գործի. պոկել ումից ինչ ու որքան կարող է: