Ծխախոտի դեմ պայքարի միջազգային օրն է

Առողջապահության համաշխարային կազմակերպությունն այսօր նշում է Ծխախոտի դեմ պայքարի միջազգային օրը, որն այս տարի անցկացվում է «Ծխախոտի ծխից ազատ տարածքե կարգախոսով եւ նպատակ ունի բարձրացնել հասարակության տեղեկացվածությունը` կապված նաեւ պասիվ ծխելու վնասի հետ: ՄԱԿ-ի մշտական համակարգող Կոնսուելո Վիդալը կազմակերպության հայաստանյան գրասենյակում կայացած միջոցառման ժամանակ նշեց, որ ծխախոտի երկրորդական ծխի վնասակարությունը չծխողների համար գրեթե նույնն է, ինչ որ` ծխողների:

Այն երեխաների ու չափահասների մոտ առաջացնում է քաղցկեղ, ինչպես նաեւ լուրջ շնչառական եւ սրտամկանային հիվանդություններ: Մարդկանց` ծխախոտի երկրորդական ծխի ազդեցությունից պաշտպանվելու համար անհրաժեշտ է ձեւավորել 100 տոկոս ծխազուրկ միջավայրեր: Ծխախոտը մահացության երկրորդ հիմնական պատճառն է աշխարհում: Դրանից ամեն տարի ավելի շատ մարդ է մեռնում, քան պատահարներից, ինքնասպանություններից, սպանություններից, ՁԻԱՀ-ից եւ թմրանյութերից միասին վերցված: ԱՀԿ-ի հետազոտություններից պարզվել է, որ կանոնավոր ծխողների կեսը` շուրջ 650 մլն մարդ, աշխարհում կմահանան հենց ծխախոտից:

Կ. Վիդալը նշեց, որ հավասարապես անհանգստացնող է այն հանգամանքը, որ հարյուր հազարավոր մարդիկ, ովքեր երբեւէ չեն ծխել, յուրաքանչյուր տարի մահանում են այնպիսի հիվանդություններից, որոնք առաջանում են ծխախոտի երկրորդական ծխից:

ԱՀԿ-ն իր անդամ բոլոր պետություններին տվել է հրատապ ազդանշան` բոլոր փակ հասարակական վայրերն ու աշխատատեղերը դարձնել 100 տոկոս ծխախոտազուրկ, ինչը դառնալու է կազմակերպության անդամ երկրների` ծխախոտի դեմ պայքարի նոր քաղաքականության մի մասը: Կ. Վիդալը շնորհակալություն հայտնեց ՀՀ կառավարությանը, Առողջապահության նախարարությանն ու հասարակական կազմակերպություններին այդ աշխատանքները կանոնակարգելու եւ առաջին քայլերն իրականացնելու համար: