Մյասնիկյան պողոտայում կատարված սպանության հետքերով․ ի՞նչ թելերով է կապվում Արգամ Աբրահամյանի անունը սպանությունը կատարած անձի հետ

2023 թվականի մայիսի 1-ին լրատվամիջոցներում տեղեկություն տարածվեց, որ նախորդ օրը՝ ապրիլի 30-ին կրակոցներ են հնչել Երևանում։ Իր բնակության հասցեի տարածքում արձակված կրակոցների հետևանքով սպանվել էր 54-ամյա Սողոմոն Վ․-ն։

ՆԳՆ ոստիկանությունը դեպքի մասին հայտնեց, որ այդ օրը՝ ժամը 23.54-ին, ՆԳՆ ոստիկանության օպերատիվ կառավարման կենտրոն հաղորդում էր ստացվել, որ 911 ծառայություն զանգած քաղաքացին հայտնել է, որ Մյասնիկյան պողոտայի 2-րդ շենքի մուտքի մոտ անգիտակից վիճակում գետնին ընկած արնահոսող տղամարդ կա: Պարզվել էր, որ ժամը 23.00-ին նշված շենքի բակում անհայտ անձը դեռևս չպարզված հրազենից երկու անգամ կրակել է նույն շենքի 53-ամյա բնակչի ուղղությամբ, որը մահացել է:

Քննչական կոմիտեն էլ նույն օրը հայտնեց, որ դեպքի առթիվ ՀՀ քննչական կոմիտեի Կենտրոն և Նորք-Մարաշ վարչական շրջանների քննչական երրորդ բաժնում 2023թ․ մայիսի 1-ին ՀՀ քրեական օրենսգրքի 155-րդ հոդվածի 1-ին և 335-րդ հոդվածի 1-ին մասերով նախաձեռնվել է քրեական վարույթ։ Նշված շենքի շքամուտքի մոտ հայտնաբերվել է արական սեռի, գլխի շրջանում առերևույթ հրազենային վնասվածքով տղամարդու դիակ։ Ըստ ՔԿ-ի՝ արդեն պարզվել էր վերջինիս ինքնությունը, ով հանդիսանում է նույն շենքի բնակիչ, վերջինս, ըստ նախնական տվյալների, Հոլանդիայի քաղաքացի է։ Դեպքի վայրի զննությամբ հայտնաբերվել է երկու հատ պարկուճ, շքամուտքի դռան վրայից առերևույթ հրազենային զենքից կրակված գնդակի բեկոր, ինչպես նաև քննությանը հետաքրքրող այլ առարկաներ:

Հաջորդ օրը՝ մայիսի 2-ին՝ ժամը 17.40-ին, Բագրատաշենի սահմանային անցակետի հարակից ավտոկայանատեղիում հայտնաբերվել, սպանություն կատարելու հիմնավոր կասկածով ձերբակալվել և ոստիկանության Կենտրոնական բաժին է տեղափոխվել Արարատի մարզի Արևշատ գյուղի 41-ամյա բնակիչը:

NEWSPRESS.am-ի տեղեկություններով՝ սպանվածը «Հիսունական» կոչվող կրոնական միավորման ղեկավարներից էր։ Նման տեղեկության մենք հանդիպեցինք նաև համացանցում՝ Հայկ Պետոյան օգտատիրոջ կողմից, հետևյալ մեկնաբանմամբ․ 

«Հայտնի Ավետարանիչ և Քարոզիչ Սողոմոն Վլասյանին (կամ ավելի հայտնի որպես «Սողոմոն եղբայր») դաժանաբար սպանել են ատրճանակով իր տան մուտքի մոտ՝ Նպատակաուղղված Դիտավորյալ կամ Պատվերով։ Դեպքը տեղի է ունեցել ապրիլի 30-ին, ժամը 23:50-ի սահմաններում, Երևանում՝ Հայաստանի մայրաքաղաքում, այն երկրում, որն աշխարհում առաջինն է ընդունել Քրիստոնեությունը»։ 

Մեզ հայտնի է դարձել նաև, որ Վլասյանի սպանության մեջ կասկածվողի անունը հյուսվում է նախկին վարչապետ Հովիկ Աբրահամյանի որդու՝ Արգամ Աբրահամյանի հետ․․․ 

Ինչպես ոստիկանությունն է նշել, Արևշատի  41-ամյա տղամարդը, մեր տեղեկություններով՝ Գեղամ Հակոբյանն է։ Վերջինս էլ, Արարատի մարզում առհասարակ, շատերին է հայտնի, որ հանդիսանում է Արգամ Աբրահամյանի թիկնազորի ամենահավատարիմ մարդկանցից ու կամակատարը։

Ընթերոցողի տրամաբանությանն ենք թողնում հարցի պատասխանը գտնելը, թե ինչո՞ւ էր պետք մի սովորական թիկնազորի անդամին կյանքից զրկել մի մարդու, ում մասին, ըստ Shamshyan.com-ի, հարևաններն ասել են, թե «ճանաչում էին որպես երբևէ հավին քշա չանող մարդ, ում կողմից երբևէ վատ արարք չեն տեսել»։

Մեր ձեռքի տակ եղած այլ տեղեկությունները հաստատվելու դեպքում, որոնք այս պահին մենք ճշտում ենք, հանդես կգանք այլ, սկանդալային մանրամասներով։