ՌԴ-ն պարտավոր էր կանխել ադրբեջանական անցակետի տեղադրումը Հաքարի կամրջի վրա. Աբրահամյան

Ռուսաստանը պարտավոր էր կանխել ադրբեջանական անցակետի տեղադրումը Հաքարիի կամրջի վրա, հատկապես որ այն տեղակայվեց, ըստ էության, իր հենակետից 20-30 մետր հեռավորության վրա: Այս մասին այսօր ԱԺ-ում կայացած ճեպազրույցի ժամանակ ասաց «Պատիվ ունեմ» խմբակցության պատգամավոր Տիգրան Աբրահամյանը: 

Նրա խոսքով՝ ՌԴ-ն ոչ միայն որպես եռակողմ փաստաթղթի ստորագրման կողմ, այլ նաև մեր ռեգիոնում ներկայացված խոշոր խաղացող, բնականաբար, այս մասով ունի իր պատասխանատվությունը:

«Պատասխանատվության մասը ես շեշտում եմ նաև այն պատճառով, որ Ադրբեջանը որպես փաստ արդեն արձանագրում է իր անցակետի գոյությունը, և դա փորձում է օգտագործել ոչ միայն Հայաստանին՝ բանակցային գործընթացում, այլ նա դա օգտագործելու է նաև հետագայում: Ընդ որում՝ անկախ նրանից, թե հետո ով կլինի իշխանություն: Եվ երկրորդ՝ ադրբեջանական անցակետի տեղակայումը շատ ավելի ծանր իրավիճակ է ստեղծել Արցախում ապրող մեր հայրենակիցների համար: Այսօր, ժամանակ առ ժամանակ, խնդիր է առաջանում Կարմիր խաչի աշխատանքներում, որը փորձում է հիվանդներ տեղափոխել, իսկ ՌԴ-ն էլ որոշակի պարենային խնդիր է ապահովում: Իսկ ադրբեջանական անցակետի տեղադրումից հետո նույնիսկ այդ ճակատում բավականին մեծ բարդություններ են առաջացել: Այս տեսանկյունից պետք է հաշվի առնել այն հանգամանքը, որ կողմերը պարտավոր են կատարել իրենց ստանձնած պարտավորությունները և հատկապես այն համատեքստում, որ ՀՀ-ն նոյեմբերի 9-ի փաստաթղթի բոլոր պարտավորություններն իրականացրել է, որքան էլ դա ծանր է եղել Հայաստանի և Արցախի համար: Երեք շրջանների հանձնումը՝ Քաշաթաղի, Շահումյանի, որը Քարվաճառն է, և Ակնան՝ նախկին Աղդամը: Նաև Ադրբեջանին են փոխանցել գերեվարված անձանց: Նույնիսկ Ադրբեջանին են վերադարձվել դիվերսանտներին, որոնք 2014թ.-ի հանցագործությունից հետա հայտնվել էին անազատության մեջ»,- նշեց Աբրահամյանը: 

Նրա խոսքով՝ Ադրբեջանն այդպես էլ չիրականացրեց իր մասով ստանձնած պարտավորությունները: