Վանաձորի համատիրությունների ղեկավարները կարգազանց են, քաղաքապետը` անհաղորդ

Վանաձորցին ընդդեմ 8 համատիրությունների ղեկավարների դատական գործն ավարտվեց:

Դեռևս ապրիլ ամսին Վանաձորի բնակիչ Անդրանիկ Սերգոյանը հարցում էր ուղարկել քաղաքապետարանի համատիրությունների եւ բնակարանային տնտեսության բաժին: Այս հարցմամբ` նա փորձել էր իմանալ, թե որտեղ են փակցվում Վանաձոր համայնքի ավագանու նիստերի օրակարգերն ու արձանագրությունները: Ու քանի որ, քաղաքապետարանից պատասխանել են, թե այդ լիազորությունը քաղաքի 56 համատիրություններին է տրված, ուստի Անդրանիկ Սերգոյանը հարցումներն ուղարկել է հենց այս համատիրություններին:

«56 հարցում ենք ուղարկել ու 5-օր հետո հերթով զանգել ենք իմանալու, թե արդյոք մեր ուղարկած հարցումները ստացել են: Զարմանալին այն էր, որ համատիրության ղեկավարներից շատերը չգիտեին, որ հարցմանը պետք է պատասխանեն: Ու երբ ես բացատրում էի, որ դա օրինական է, երբ քաղաքացին նման հարցում է ուղարկում տեղեկատվություն ստանալու համար, նրանցից շատերն էլի միևնույնն է` սխալ էին ընկալում կատարվածը: Նրանք մեզ ասում էին, թե «Ձեր օրենքը մեզ հետաքրքիր չէ»»,-newspress.am-ի թղթակցի հետ զրույցում խնդիրը ներկայացրեց Անդրանիկ Սերգոյանը:

Վերջինիս խոսքով` բազմաթիվ բացատրական աշխատանքերից հետո 56 համատիրություններից մի մասն իրենց ինչ-որ կերպ արձագանքել է: Սակայն նրանցից 8-ն ընդհանրապես չի պատասխանել: Անդրանիկ Սերգոյանն 3 ամիս սպասելուց հետո վերջապես այս 8 համատիրություններին դատի է տվել:

Դրանցից 5-ը` Մուշի, էվրիկայի, Կենտրոնի, Ուրարտուի, Ցալկուտի ղեկավարները ( որոնք այդպես էլ դատարան չներկայացան) դատարանի միջնորդությամբ պատասխանեցին հարցմանը:

Հայցվոր Անդրանիկ Սերգոյանը դատը շահեց, բայց, ինչպես հետագայում պարզվեց, 3 համատիրությունների`Ուրարտուի, Ցալկուտի, Կենտրոնի ղեկավարներն այդպես էլ չէին պատասխանել հարցմանը:  Հարկ է նկատել, որ այս 3-ն էլ գրանցված են նույն հասցեում` մեկ հեռախոսահամարով:

Այս համատիրությունների ղեկավարները դիմել էին Վանաձորի քաղաքապետարանի համատիրության եւ բնակարանային տնտեսության բաժնի պետ Գրիշա Պառավյանին, որն էլ իր հերթին գործը հանձնարարել էր աշխատակից Գարեգին Մատինյանին եւ ընդհանուր պատասխան էր ուղարկվել վճռի հրապարակումից առաջ, նշելով այն հասցեները, որտեղ համատիրության ղեկավարները փակցնում են ավագանու կայանալիք նիստերի օրակարգն ու արձանագրությունները:
Այլ կերպ ասած` քաղաքացու ուղարկած հարցմանն ի վերջո պատասխանել է քաղաքապետարանը:

Այստեղ կա մեկ այլ զավեշտ. համատիրության ղեկավարները մինչ այժմ չեն ընդունում, որ իրենք օրենք են շրջանցել: Ասել է թե` համատիրությունների ղեկավարների պաշտոնն ստանձնել են, մարդիկ, ովքեր չգիտեն իրենց իրավունքների եւ պարտականություների մասին: Ու չնայած նրան, որ քաղաքացին դատը շահել է, նրանք էլի հին երգն են երգում, թե այդ հարցումներին պատասխանելն իրենց գործառույթում չէ: Ու որ ամենակարևորն է` քաղաքային իշխանությունը` քաղաքապետի գլխավորությամբ աչք է փակում այս անգրագիտության ու բարձիթողի վիճակի վրա: