Արցախում հավաքված ստորագրությունների օրինակները հանձնվեցին դեսպանություններին, ՄԱԿ-ի գրասենյակին և ՀՀ կառավարությանը

«Ո՛Չ Արցախի էթնիկ զտմանը» պահանջագրի և ստորագրահավաքի
նախաձեռնող խմբի աջակիցներն Արցախում հավաքված ավելի քան 60 հազար ստորագրությունների թղթային տարբերակների կրկնօրինակներն այսօր՝ մայիսի 12-ին, հանձնեցին Հայաստանի Հանրապետությունում Ամերիկայի Միացյալ Նահանգների, Ֆրանսիայի Հանրապետության և Ռուսաստանի Դաշնության դեսպանություններին՝ որպես ԵԱՀԿ Մինսկի խմբի համանախագահ երկրներ, ՄԱԿ-ի հայաստանյան գրասենյակին և ՀՀ կառավարությանը: Ակցիայի օրվա ընտրությունը խորհրդանշական էր․ 29 տարի առաջ այս օրը՝ 1994թ. մայիսի 12-ին է ուժի մեջ մտել կրակի և ռազմական գործողությունների դադարեցման մասին համաձայնագիրը։

Արցախի մի խումբ երիտասարդների նախաձեռնած պահանջագրով կոչ է արվում ապահովել 2020թ. նոյեմբերի 9-ի եռակողմ հայտարարության դրույթների, ինչպես նաև ՄԱԿ-ի Արդարադատության միջազգային դատարանի 2021թ-ի դեկտեմբերի 7-ի, 2023թ-ի փետրվարի 22-ի և Մարդու իրավունքների եվրոպական դատարանի 2020-2022թթ. որոշումների կատարումը և դադարեցնել Արցախում Ադրբեջանի էթնիկ զտման ու ցեղասպանական քաղաքականությունը:

«Ավելի քան 150 օր, մոտ կես տարի է՝ Արցախը շրջափակման մեջ է, սակայն ցավոք մեզ մոտ՝ Հայաստանում, տպավորություն է, թե ոչինչ չի կատարվում։ 120 հազար հայեր պատանդի կարգավիճակում են։ Այն անտարբերությունը, որը կա Հայաստանում և աշխարհում, պետք է կոտրվի։ Արցախցիները խնդրեցին իրենց ձայնը հասցնել դեսպանատներին, մենք էլ աջակիցներով միացանք»,- ասաց «Ո՛Չ Արցախի էթնիկ զտմանը» պահանջագրի և ստորագրահավաքի նախաձեռնող խմբի աջակից Գարիկ Գևորգյանը։

Ակցիային միացել էին նաև Հայաստանում բարձրագույն կրթություն ստացող, նախաձեռնող խմբի աջակից արցախցի մի խումբ երիտասարդներ։
«Հարազատներս, որոնք Արցախում են, լավ են, չեն բողոքում, չեն հուսահատվել և պատրաստ են պայքարի։ Ինքս էլ ամեն պահի պատրաստ եմ վերադառնալ Արցախ, միայն թե ճանապարհը բացվի»,- ասաց Առնոլդ Ղազարյանը։

Ակցիայի կազմակերպիչները շեշտեցին, որ այսքանով ստորագրահավաքը չի դադարեցվում, այն շարունակվելու է օֆֆլայն, ինչպես նաև օնլայն տարբերակով
change.org հարթակում՝ նշված հղումով:

«Ո՛Չ Արցախի էթնիկ զտմանը» պահանջագրի և ստորագրահավաքի նախաձեռնող խումբ