Ադրբեջանը փորձում է հայաթափել Սյունիքը. գյուղերում ականներ են տեղադրում, որից կենդանիներ են սատկում. Արման Թաթոյան

Արցախի և Հայաստանի միջև տարանջատում չկա, Ադրբեջանի թիրախը, առհասարակ, հայկականությունն է։ Եթե ադրբեջանական կողմը մի պահ որոշում է առանձնացնել Արցախը, սա չի նշանակում, որ Հայաստանն իրենց թիրախում չէ։ Այս մասին այսօր հրավիրված ասուլիսի ժամանակ ասաց ՀՀ նախկին ՄԻՊ, «Թաթոյան» հիմնադրամի ղեկավար Արման Թաթոյանը։

Թաթոյանը նշեց, որ թշնամին ամրանում է հայկական տարածքում և ակնհայտ է, որ դուրս գալու մտադրություն չունեն։

Ավելին՝ Թաթոյանի խոսքով,  ադրբեջանցի զինծառայողները Սյունիքի մարզի գյուղերում ականներ են տեղադրում:

«Նրանց քայլերը ուղղված են խաղաղ բնակչության կյանքը անհնարինության վերածելու, որ մարդկանց ստիպեն հեռանալ»,-ասաց նա։

Թաթոյանը ցստահեցնում է, որ ադրբեջանցիներն ագրեսիվ ապատեղեկատվություն են տարածում։ Այն, ինչ իրե՛նք են անում, «գցում են» հայկական կողմի վրա ու ագրեսիայի հիմքեր ստեղծում:

«Դրանցից ամենավառ օրինակն ականների տեղադրման հարցն է։ Մենք խոսում ենք մարդկանց հետ և պարզ է դառնում, որ ադրբեջանցի զինծառայողները գրեթե ամեն տեղ ականներ են տեղադրում, քանի որ կենդանիներ են սատկում ականների պայթյուններից, մարդիկ էլ չեն կարողանում օգտագործել իրենց հողերը։ Ադրբեջանական զինծառայողները բացի նմանատիպ քայլերի դիմելուց, նաև պարզապես զավթել են հայկական հողերը, արոտավայրերը, տները»,– նշեց Թաթոյանը։

Նրա խոսքով` ակնհայտ է դառնում, որ Բաքուն այդ տարբերակով փորձում է հայաթափել այդ հատվածները։