Ալիևը փորձում է վերցնել Սևանի աջ ափը․ Արամ Սարգսյան (տեսանյութ)

«Հայաստանի Դեմոկրատական կուսակցության» հիմնադիր Արամ Սարգսյանը «Հայելի» մամուլի ակումբում տեսակետ հայտնեց, որ Ադրբեջանի նախագահ Իլհամ Ալիևը սահմանային այս էսկալացիայով նպատակ ունի գրավել Սևանա լճի աջ ափը։ 

«Այս ամբողջը բոլոր նրանց համար է, որ ասում են՝ Նիկոլը խաղաղություն է բերում, կարևորը կարողանում է ինչ-որ ձևով զսպել ադրբեջանցիներին, թուրքերի հետ սիրախաղեր անել։ Ի՞նչ սիրախաղեր, էս ո՞ր դարն է, որ Թուրքիայի դիվանագիտությունը չգիտի, թե ով է իր դիմաց կանգնած։ Նրանց նպատակը հստակ է, նրանք ամեն ինչ պետք է անեն, որ Սևանի ափը գրավեն, դա միանշանակ է արդեն։ Եվ դրա մասին իրենք չեն թաքցրել, անընդհատ ասել են, որ այդ տարածքն իրենց պետք է»,- նշեց Սարգսյանը։ 

Նա հարց է ուղղում նրանց, ովքեր պնդում էին, թե Արևմուտքն է զսպել Ադրբեջանին Ջերմուկի ուղղությամբ սանձազերծած պատերազմի ժամանակ․ «Բա ո՞ւր է ձեր Արևմուտքը, ինչո՞ւ չի կարողանում կանխել, վերջ ի վերջո, հողի վրա են կանխում պատերազմը։ Եթե մենք շարունակելու ենք ձեռք առնել ռուսական կողմին, որը, ցավոք, միակն է այս պահին որպես երաշխավոր, ուրեմն կստանանք այսպիսի իրավիճակ»,- ասաց Սարգսյանը՝ հավելելով, որ եթե իշխանություններն ուզել են արտաքին վեկտոր փոխել, ապա թող բարի լինեին այդ վեկտորին համապատասխան այլընտրանք ունենային։ 

Քաղաքական գործիչը, սակայն, համոզմունք հայտնեց, որ այդ վեկտորի փոփոխությունը Թուրքիան է։ 

Մանրամասները՝ տեսանյութում