Աշխարհի առաջնությունում պայքարելու եմ ոսկե մեդալի համար․ Նարեկ Մանասյան

Բռնցքամարտի, Եվրոպայի բրոնզե մեդալակիր Նարեկ Մանասյանն աշխարհի առաջնությունում այսօր իր երկրորդ մենամարտն է անցկացրել: 92 կգ քաշայինների 1/8 եզրափակչում Մանասյանը մենամարտել է իրանցի Պուրիա Ամիրիի հետ և երեք ռաունդներում ունենալով բացահայտ առավելություն՝ 5:0 հաշվով հաղթանակ է տարել ու դուրս եկել քառորդ եզրափակիչ, գրում է Armsport.am-ը։

Եվս մեկ հաղթանակ տանելու դեպքում՝ Մանասյանն առնվազն բրոնզե մեդալ կապահովի: Հաղթանակից հետո Մանասյանը կիսվել է տպավորություններով:

«Առաջին ռաունդում մեծ առավելություն կար: Լսում էի մարզիչներին, որոնք ճիշտ ուղղումներ էին անում: Երկրորդ ռաունդից փոխեցի մարտավարությունն ու սկսեցի աշխատել ավելի ծանր հարվածների վրա: Երկրորդում էլ ունեցա առավելություն, իսկ երրորդ ռաունդում արդեն նպատակս հիմնականում վնասվածք չստանալն էր: Ինչ վերաբերում է քառորդ եզրափակչի մենամարտին, ապա կասեմ, որ ուսումնասիրել ենք մրցակցին և հնարավորինս լավ պատրաստվել: Պետք է աշխատեմ սխալներս շտկելու ուղղությամբ և շարժվեմ առաջ: Նպատակս ոսկե մեդալ նվաճելն է»,- Մանասյանի խոսքերն է մեջբերում ԿԳՄՍՆ պաշտոնական կայքը: